Ropuina ramah Michael Phelps

Michael Phelps chuan nimin zing khan Olym-pic-a a hnuhnung ber atan 4x100m medley relay-ah inlanin Unites States tan hnehna an chang a. Phelps hian Olympic chanchinah gold medal 23 zet a la tling ta a, infiamna khawvelah ani aia ropui an awm chuang lo.

Kum 31-a upa Phelps hian Rio Olympic-a a title palina la tur hian Ryan Murphy, Cody Miller leh Nathan Adrian te nen minute thum leh second 27.95 hun an hmang. Pahnihna chu Great Britain niin US an phak lohna hi second 2.71 a ni a, pathumna chu Australia an ni thung.

4x100m medley relay bikah hian US hi an chungnug fal hle a, kum 1960 aṭang khan hnehna an la chang ziah. 1980 Moscow-ah erawh hrem vangin an inlan lo thung.

American legend hian Rio Olympic-ah 200m butterfly, 4x100m freestyle relay, 4x200m freestyle relay leh 4x100m medley relay-ah te gold a la a, 100m butterfly inelnaah erawh pahnihna dinhmun a luah thung a ni.

Olympic chanchina mimal medal la hnem ber Phelps hian gold medal ringawt pawh 23 zet a lak bakah silver pathum leh bronze pahnih a la tawh bawk. Olympic medal lak hnem zawnga amah hnaih bertu Soviet gymnast Larisa Latynina chuan pakua lai la pha mah se an inthlauhna hi medal 14 zet a ni!

Phelps chuan, "Tu tan pawh Olympic medal lak hi thil awlsam a ni lo a, theihtawp chhuah a ngaih bakah mahni inthununna nen inbuatsaihna neih
ṭhat a pawimawh," tiin pianpui theihna tichak tura thawhrim tel a pawimawh thu a sawi.