Hull City-in champion lai Leicester City an hre lo

Premier League kai thar Hull City-in an mual KC Stadium-ah champion lai Leicester City chu 2-1 in an hneh. Kum 1989-a Arsenal-in Manchester United an hneh loh hnua league ṭan nia champion lai an chak loh lehna hmasa ber a ni.

Hull City-in inhliam an ngah a, Steve Bruce an ban hnuah a thlakna an la neih loh bakah Premier League an kai hnuah player thar an lalut lo. Inkhelh ṭan hmain Tigers ṭantuten club neitu Assam Allam an duh loh thu an au chhuah pui a, manager lailawk Mike Phelan kaihhruai Hull City hian Leicester City laka an chetṭhat a rinawm loh.

Amaherawhchu Hull-in first half injury time-ah goal an khung a, goal hmahruai luh theih nan hian Adama Diomande leh Abel Hernandez ten invawrh chungin ball pet fuh ve ve mah se Norwegian forward Diomande chu goal khungtu zawka chhiar a ni. Leicester-in second half ṭan aṭanga minute hnihnaah Riyad Mahrez penalty hmangin an sut a, chak phu zawk Hull City-in minute 57-naa Robert Snodgrass-a goal hmangin hnehna an chang.

Foxes midfielder Andy King-a'n Chelsea pan ta N'Golo Kante a thlak zo lo a, defender Robert Huth hrem a nih avangin player Luis Hernandez chu captain Wes Morgan-a kawppui a ni. Spanish defender Hernandez-a ball theh na tak chu goal nawr nan a ṭha ngei a, tlar hnung erawh a nghing tih zep rual a ni lo.

Arsenal hnartu Jamie Vardy-a'n season liam taa goal a khungna ṭhinah a hlah a, Nigerian winger Ahmed Musa hmuhnawm mah se a teammate tharte nen inhriatthiam tawnna an tlachham.

Leicester manager Claudio Ranieri chuan, "Mimal ang chuan kan khelṭha a, team angin kan khel ṭha lo. Chak tum viau mah ila tlar hnung an rem phui ṭhat avangin a harsa a ni. Tihsual kan nei a, kan tih dik loh lai kan hriat a ṭul a ni," tiin a sawi.

Foxes-in King Power Stadium-a match hmasa ber atan Arsenal an mikhual ang a, tun Inrinni vek hian Hull City-in Swansea an tlawh bawk ang.