RIO olympic 2016 Semifinal khel turin Brazil an chak

Barcelona forward Ney-mar-a'n Olympic football khelh meka Brazil tana a goal hmasa ber a khung a, Colombia lakah an ram hi 2-0 a hnehna chanpuiin Olympic semifinal an lut.

Inkhelh ṭan aṭanga minute 12-na lekah Brazil-in goal an khung nghal a, captain Neymar chuan free kick aṭangin a pet lut. Goal an chhuah hnuah Colombia an tho leh tawh lo a, Brazil tan second half-ah Luan chuan goal dang khung ve lehin gold medal dawng turin kawng dik an zawh zel.

Brazil hian Rio Olympic football-ah bul an ṭan ṭha lo hle a, an match hmasa pahnihah Iraq leh South Africa chu goal khung loin an inhnehtawkpui ve ve a, an group stage match hnuhnung berah Denmark 4-0 a sawpin hartharna an chang. Tunah team ṭha Colombia awlsam taka an hneh leh tak avangin gold dawng tura beisei kai ber an ni leh tawh.

Semifinal-a Brazil hma-chhawn turin Honduras chuan 1-0 in South Korea an hneh a, he inkhela goal awmchhun hi Alberth Elis khung a ni. South Korea tan an player chhuan-vawr Son Heung-min chuan hun ṭha nei ngun viau mah se Tottenham forward hian a hun ṭha neih a chhawr
ṭangkai thei lo.

Quarterfinal inkhel dangah Germany chuan team ṭha an nihzia pholangin Portugal chu 4-0 in an sawp. Germany tan Arsenal midfielder Serge Gnabry, Borussia Dortmund defender Matthias Ginter, RB Leipzig striker Davie Selke leh Augsburg defender Philipp Max ten goal khat ṭheuh khungin Portugal-in tih theih an nei lo.

Semifinal-a Germany hmachhawn turin Nigeria chuan 2-0 in Denmark an hneh bawk a, African team tan Chelsea midfielder John Obi Mikel-a'n goal hmahruai a khung hnuah Turkish club Osmanlispor striker Aminu Umar chuan an goal hnihna a khung ve leh a, Denmark-in goal an khung ve theih miau loh avangin Nigeria an chungnung ta zawk a ni.