Mumbai tana khel tur Diego Forlan

Manchester United striker hlui Diego Forlan chuan Indian Super League-ah Mumbai City tana khel turin contract a ziak. Uruguayan forward hlawh zat tur hi tarlan ni lo mah se thla thum chhunga vaibelchhe 7 bawr vel hlawh tura beisei a ni.

Uruguay tan vawi 112 inlana goal 36 khungtu striker hi Atletico de Kolkata nen an indawrna a hlawhchham hnuah Mumbai club an inrawlh a, an hlawhtling. Kum 37-a upa striker hian Atletico Madrid tan season li a khelh chhungin match 196 a inlanah goal 96 khung sakin 2008-09 khan European Golden shoe a dawng.

Villarreal tan a khelh laiin 2004-05 khan Europe-a goal khung hnem ber dinhmun hi a lo luah tawh bawk a, FIFA World Cup 2010-ah khan an ram team chu semifinal hruai thlengin Best Player atan thlan a ni bawk. Europe-a a cham chhungin Premier League, FA Cup, Europa League leh UEFA Super Cup-ah te vawi khat ṭheuh nomawi a chawi a, kum 2011 khan Uruguay chu 2011 khan Copa America-ah a champion pui bawk.