Puerto Rico tan Puig a champion

Monica Puig chuan Angelique Kerber hnehin Puerto Rico tan Rio Olympic hmeichhe singles tennis champion a ni a, an ram chanchina Olympic gold medal dawng thei hmasa ber a ni bawk.

Seedeed pawh chang phak lo Puig hian Australian champion leh world number 2 ni bawk Kerber hi inkhel inhnehtawk takah 6-4, 4-6, 6-1 in a hneh. German nula Kerber hi champion tura rinkai zawk ni mahse a service a nat tawk loh bakah a ball vuak a tih sual fo avangin a chak lo zawkah a ṭan phah.

Mipui 3,474,182 vel bawr lek awmna Puerto Rico hian Rio Olympic-ah hian infiamna kawng hrang hrang 15-a inlan turin athletes 40 an tir a, nimin tlai thleng kha chuan an zingah Puig chiah hi medal dawng thei a la ni rih.

Kum 22-a upa Puig chuan, "Mi ṭawng tam ka ni lo a, ka sawi theih awmchhun chu ka duhthusam a thleng dik tih a ni," a ti. WTA ranking-a atawn san lai bera 33-na dinhmun lo luah ve tawh hian Rio-a a hlawhltinna chuan hmalamah hlawhltinna dang a thlen belh theih ngei a beisei thu a sawi tel bawk.

Pathumna zawnnaah Czech Republic nula Petra Kvitova chuan United States aiawhtu Madison Keys chu 7-5, 2-6, 6-2 a hnehin bronze medal a dawng ve bawk.