Goodison Park-ah Spurs an vannei

Ronald Koeman-a enkawlna hnuaia an match hmasa berah Everton an hmuhnawm nghal a, an mikhual Tottenham Hotspur nen 1-1 a inhnehtawkin team vannei zawk chu Spurs an ni.

Toffees-in game rang leh hmuhnawm an khel a, inkhelh ṭan aṭanga minute 5-na lekah Ross Barkley chuan free kick-in goal hmahruai a khung nghal. Team pahnihin goal an khung loh reng hnuah Erik Lamela a inlar a, Argentine winger hian minute 59-naah an si phurh sut nan Kyle Walker ball cross a tauh lut.

Spurs goalkeeper Hugo Lloris chu minute 35-naah hliam vangin lakchhuah a ni a, malpui hliam vanga lakchhuah France international keeper nat dan hi eng ang chiah nge a nih an la hriatchian loh thu Tottenham manager Mauricio Pochettino chuan a sawi.

Team pahnih player thar zingah Aston Villa aṭanga Everton zawmtu Idrissa Gueye a hmuhnawm a, Senegalese defensive midfielder hi Spurs goal nawr tur dangchattu a ni. Spurs tan Dutch striker Vincent Janssen a hmuhnawm nghal a, Premier League-ah a hming a chher chhunzawm a nih pawn a mak lo ang.

Manager thukhawchang

Everton boss Ronald Koeman chuan, "Team pahnihin chance ṭha tak kan nei ve ve a, result fair tak a ni. Team ṭha tak kan hma-chhawn a, kan khelh danah khan ka lawm em em a ni. Karleh lamah player thar pahnih kan neih belh ka beisei bawk," tiin transfer chungchang a sawilang nghal.

Tottenham manager Mau-ricio Pochettino, "Everton khan hma taka goal an khung avangin hnehna chan theih an inbeisei a, kan tan chuan a harsa tawh a ni. Player pahnih emaw pakhat tal chu kan lakbelh ang," tiin a sawi ve bawk.

Baggies chakna Rondon

Crystal Palace khelmualah West Brom-in hnehna an chang a, Salomon Rondon chuan minute 74-naah he inkhela goal awmchhun hi a tauh lut a ni.

West Brom boss Tony Pulis chuan, "Hnehna chan kan phu a, kan khelh danah ka lawm a ni. Premier League-a cham chhunzawm zel turin theihtawp kan chhuah a, chumi tur chuan Saido Berahino goal khung kan mamawh dawn a ni," tiin Stoke-in pound maktaduai 20-a an rim a striker chu a chelh a inbeisei.

Swansea chuan Burnley lakah 1-0 in hnehna an chang a, he inkhela goal awmchhun hi Leroy Fer khung niin Spain international striker Fernando Llorente ball tauh Burnley goalkeeper Tom Heaton-a lo dan per chu Fer hian hnai tak aṭangin a khung a ni.

Boro tan Negredo a vul

Middlesbrough tan striker thar Alvaro Negredo-a'n a match hmasa berah goal a khung nghal a, Stoke City nen 1-1 a inhnehtawkin Potters goal hi Xherdan Shaqiri-a'n free kick aṭanga khung a ni.

Spanish striker hian Manches-ter City leh Boro tan Premier League-a target-a shot a neih hma-sak berah goal a khung nghal ve ve!

Southampton tan Nathan Redmond chuan a match hmasa berah goal khung nghalin Watford nen 1-1 in an inhnehtawk a, Watford midfielder Ben Watson chu minute 76-naah hnawhchhuah ni mah se a tam zawk nichungin Saints an chak zo lo.