I Day Football 2016 Final - 3:00 PM MPL kaithar leh Champion lai Ramhlun North Vs Aizawl FC
Mizoram Premier League kaithar Ramhlun North FC-in I Day Football champion turin match khat chak chiah an hmabak tawh - nomawi chawi nge an thlan hnai taka Aizawl FC nomawi chawi lai thlir tih chu an duh thlannaah a innghat ta!
Vawiin tlai dar 3:00 hian Ramhlun North leh Aizawl FC ten Lammualah I Day Football final an khel dawn.
Zirtawpni zan semifinal-a I League club Shillong Lajong ngamtu K. Malsawmkima hote Aizawl hi champion tura rinkai an ni. MPL ṭan hnuah I Day Football-a champion zawn thei an la awm lo a, kum thum a zawna final lut thei Aizawl FC tan vawiin hi bung thar kai theihna hun ṭha a ni.
Mizo hmel timawitu AFC
Kum nga liam ta khan Shillong Lajong FC chu harsatna nei loin I Day Football-ah an champion a, final-a an khingpui pawh mikhual team tho Royal Wahingdoh FC an ni. Kumin inelnaah Lajong-in group stage-ah hneh loh an tawng lo a, semifinal an luh chian tawh hnua Dinthar FC nen an inhnehtawk tih loh chu an chak vek.
Semifinal-ah Thangboi Singto hote hian Aizawl FC lakah Lalramchullova'n (32') an lama a tihluh leh Lengpui rawlthar Joe Zoherliana (50') te goal hmangin
ṭum hnih hma an hruai. MPL club-in Bright Middleton Mends (43') leh Albert Zohmingmawia (86') te hmanga sut ve vein minute 90 chhungin 2-2 in an inhnehtawk. Extra time-ah Mizo club an huai zawk a, minute 104-naah AFC tan Albert-a'n a goal hnihna leh chakna goal a khung.
Coach Mala leh a naute zarah tualchhung inelna ngaihhlut I Day Football nomawi chuan Mizoram a chhuahsan dawn ta lo.
Lajong coach Thangboi Singto chuan, "Goal kan khung hmasa a, chak thei pawh kan ni ngei mai. Amaherawhchu hun tawp lamah Aizawl FC an khel ṭha zawk a, chak phu zawk pawh an ni. Final ṭha taka an khelh theih nan duhsakna ka hlan," tiin an hneh loh MPL champion a fak.
Final chu
Ramhlun North hi Shillong Lajong 4-1 a hneh lotu tia thlir tan chuan Aizawl FC nomawi chawi lai a hmuh theih nghal ang. Nimahsela Ramhlun North hi Aizawl FC ngam loh Chanmari FC semifinal-a ngamtu tia thlirte erawhin MPL kaithar nomawi chawi lai an mitthla thei ang.
MPL kaithar I Day Football final hruai thlengtu coach Lalruatliana Sailo (Tawia) chuan, "Aizawl FC nen hian management a ni emaw, player emaw pawh ni se huang khatah ka indah lo. Hei vang hian Aizawl FC-te anga team ṭha hneh tur chuan kan thawhrim lehzual a ngai a, player-te pawhin an theih phak baka an khelh a ṭul a, kan game plan-ah kan chian tlan a ṭul a ni. Chanmari FC kan hneh thei a, football-ah thleng thei lo a awm lo," tiin team ṭha lo zawk an ni tih a inpawm thlap thu a sawi.
Aizawl FC coach pawhin, "Ramhlun North leh Chanmari FC te inkhel kha ka en a, Shillong Lajong kan hneh tak avanga kan champion chianna chhan tur ka hmu lo. Tawia hote hi team ṭha tak an ni a, champion tur chuan kan fimkhur hle a ngai a ni," tiin a inchhuang bik lo.
Champion lai hi
Aizawl FC ṭhatna ber chu tlar hnung tiin sawi theih a ni a, defender pali Lal-ram-chullova, Lalruatthara, Ricky Lallawmawma leh Lalrinzuala Khiangte te hi club dang chil tiput tham ni mah se, AIFF Under 19 lakah chiah goal an chhuah lo.
Goalkeeper ṭha pahnih Lalawmpuia leh Zothanmawia-te an inluh chhawk ṭhin a, final hi MPL vawi li awm tawha best keeper ni vek thei AwP-a luh hun a ni.
Coach Mala buaina chu goal khung lamah a ni a, final an thlen meuh chuan goal 11 an khung tawh lawi si. I Day Football-a foreign striker awm chhun Bright Middleton Mends-a'n goal hnih a khung tawh a, beisei angin Ghanaian striker hi che ṭha lo mah se starting eleven aṭanga nek chhuak zo an awm lo. Aizawl FC tana lawmna tur chu a hunah tak Albert-a'n goal a khung a, Lajong an hneh ṭum hian veteran player Rohmingthanga'n a rin tlakzia a lantir bawk.
AFC hian naupang chhawr kawngah club dang tan zir tur an hnutchhiah a, player lei belh ringawt loin junior team-a an chherchhuah player-te an ring ngam.
Veteran player leh rawlthar duhawm mawi taka inchawhpawlhna club hi champion nawn tura rinkai an ni a, Mala kaihhruaina hnuaia chak loh duh lohna thinlung an neihna tak hi team dang nen an danglamna a ni.
Ramhlun North hi
Ramhlun North hian MPL-a tawnhriat nei a kawl nual a, mimal angin chhuan tur nei lo mah se team angin an khel.
Tlar hnungah tawnhriat nei ṭha C. Ramdinmawia'n a ho a, midfield-ah Zosangliana (Chhaia) chu game siamtu niin Aizawl FC captain pawh lo ni tawh B. Malsawmzuala an kawl bawk. An forward pahnih MC Malsawmzuala leh Vanlalthlamuana ten goal nga an khung tawh a, MPL-a hming chher ve ve tawh forward te hi enliam chi an ni lo.
Ramhlun North hi team ṭha ber ni lo mah se ṭantu lamah erawh anni aia nei ṭha an awm lo. Aizawl FC hian Shillong Lajong an hneh ṭumin ṭantu an nei ṭha a, Ramhlun North mipui Lammuala an tleh phei tak tak chuan Aizawl FC ṭantute chuan an elpha lo ang.
Mipui Ṭhutna
Ramhlun North FC Ṭantute
K. Kawla Stand leh S. Malsawmtluanga Stand-ah ṭhut tur a ni.
Aizawl FC Ṭantute
Zomuanthanga Stand leh Zohminga Zote Stand-ah
ṭhut tur a ni.
Neutral Supporter
Tlang lamah ṭhut tur a ni.
Top Scorer Dampuia?
Chanmari West captain Laldampuia'n group stage match li aṭangin goal li a khung a, top scorer a ni mek. Ramhlun North forward MC Malsawmzuala'n goal thum a khung tawh a, final a khelh chuan Dampuia aiin match khatin a khel tam dawn. Hei vang hian Siaha tlangval MC-a tan top scorer ni turin goal hnih tal khung a ngai.
Ramhlun North forward Vanlaltlamuana bakah Aizawl FC forward Bright Middleton Mends leh winger Albert Zohmingmawia ten final-a hattrick an siam chuan top scorer an la ni thei bawk.
# Hming Team Goals
1 Laldampuia Chanmari West FC 4
2 Lalruafela Zote Chanmari FC 3
3 Malsawmfela Chanmari FC 3
4 R. Laldanmawia Chanmari West FC 3
5 Lalkhawpuimawia Chhinga Veng FC 3
6 MC Malsawmzuala Ramhlun North 3
7 Samuel Lalmuanpuia Shillong Lajong 3
8 Lalramchullova Aizawl FC 2
9 Bright Middleton Mends Aizawl FC 2
14 Albert Zohmingmawia Aizawl FC 2
10 MS Dawngliana Chhinga Veng FC 2
11 Samuel Laltlanthanga Dinthar FC 2
12 Vanlalthlamuana Ramhlun North 2
13 Bipin Singh Shillong Lajong 2
Final Kalkawng
Ramhlun North
GROUP B
Zo United FC 0 - 0 Ramhlun North FC
Ramhlun North FC 1 - 4 Shillong Lajong FC
RNFC : MC Malsawmzuala 83'
SLFC : Bipin Singh 8'; Alen Deory 43'; Samuel Lalmuanpuia 56';
Nim Dorjee Tamang 76'
Dinthar FC 1 - 2 Ramhlun North FC
DFC : Samuel Laltlanthanga 75'
RNFC : MC Malsawmzuala 51'; Lalremtluanga (OG) 55'
Ramhlun North FC 3 - 0 Bethlehem VT FC
RNFC : B. Malsawmzuala 36'; Vanlalthlamuana 52'; Jerry Zonunsanga 90+4'
SEMIFINAL
Chanmari FC 1 - 2 Ramhlun North
CFC : Malsawmfela 90'
RNFC : Vanlalthlamuana 38'; MC Malsawmzuala 82' (P)
Aizawl FC
GROUP A
Aizawl FC 1 - 2 Chanmari FC
AFC : Lalramchullova 86'
CFC : Malsawmfela 25'; Lalruatfela Zote 36'
AIFF Under 19 0 - 2 Aizawl FC
AFC : Bright Middleton Mends 38'; Ricky Lallawmawma 45+1'
Aizawl FC FC 3 - 2 Chhinga Veng FC
AFC : Rochharzela 55'; Lalremsanga 90'; Brandon VL Remdika 90+4'
CVFC : Khawpuimawia 19'; MS Dawngliana 90+2' (P)
Chanmari West FC 1 - 2 Aizawl FC FC
CWFC :Laldampuia 82'
AFC : Lalmuansanga (OG) 29'; Lalramchullova 60' (P);
SEMIFINAL
Shillong Lajong 2-3 Aizawl FC (a.e.t)
SLFC : Lalramchullova 32' (OG); Joe Zoherliana 50'
AFC : Bright Middleton Mends 43'; Albert Zohmingmawia 86', 104'