Chelsea boss Conte a phur

Zanin dar 12:30-ah Chelsea-in Premier League match hmasa ber an khel dawn a, Stamford Bridge-ah West Ham an mikhual ang.

Chelsea boss thar Antonio Conte chuan, "Derby hmanga bul ṭan hi a harsa ṭhin tih ka hria a, mah se ka phur a ni. Theihtawp chhuahin kan theihna sang ber nen khelh kan tum dawn a, nomawi chawi tur chuan bul ṭan fuh a pawimawh a ni," tiin Hammers laka chak ngei an tum thu a sawi.

Juventus manager hlui chuan sawi chhunzawmin, "Premier League hi chu a ropui bik a, a harsa takzet. Nomawi beisei ngam club lian tak tak an awm nual a, players ropui tak tak an awm bawk. Manager pawh khawvela ṭha ber ber an awm a, inelna nuam tak a nih dawn avangin ka phur a ni. Ka player te pawh an phur a, huaisen taka bei turin kan inpeih tawh a ni," tiin hlauh bik tumah an neih loh thu a sawi lang.

Croatian manager rorum Slaven Bilic enkawlna hnuaia insiamṭha mek Hammers-in Dimitri Payet an neih sa bakah player thar Sofiane Feghouli leh Andre Ayew te an neih belh a, awlsam taka hneh tur chi an ni lo. Blues hi Hammers an mikhual zawhah an la phur chhunzawm zel ang em? tih chu zawhna awm thei a ni - zaninah a chiang dawn.