Messi-a'n thutlukna a sut

Lionel Messi-a'n Copa America Cen-tenario final-a Chile an hneh loh hnuah Argentina jersey a hak tawh loh tur thu a sawi a, thla hnih em pawh a ral hmain a thutlukna sutin September thlaa 2018 Russia World Cup qualifying an khelh turah koh tel leh a ni.

Argentina tana goal 55 khung tawhtu Messi chuan, "Ram ka hmangaih a, hlawhtlina chanpui ngei ka duh a ni," tiin ram tana a inlan leh chhan tur a sawi. Ram tana goal khung hnem ber hian kum kaw chhunga major tournament final vawi li lai a chak lo lama an ṭan hnua a chawlh thu a puan kha ngun taka a ngaihtuah a nih ve tho thu a sawi tel bawk.

Messi chuan sawi chhunzawmin, "Argentinian football-ah hian siamṭhat ngai tam tak a awm a, pawnlam aṭang ni loin a chhung aṭanga siamṭhat a ṭul," tiin a sawi.

Argentina coach thar Edgardo Bauza hian Uruguay leh Venezeula hmachhawn tur hian Ballon d'Or chawimawina vawi nga dawng tawhtu Messi bakah hian Manchester City trio Sergio Aguero, Pablo Zabaleta leh Nicolas Otamendi, Manchester United pair Sergio Romero leh Marcos Rojo bakah Everton defender Ramiro Funes Mori te a ko bawk.

Premier League player zingah Tot-tenham winger Erik Lamela hming a lang bawk a, player 27 zingah Barcelona mid-fielder Javier Mascherano a tel bawk a ni.