Pep-a kuthnu a lang nghal
Manchester City-in Pep Guardiola hnuaia an match hmasa berah Sunderland 2-1 in an hneh. Etihad Stadium-a point thum hmu turin City vannei mah se Spanish mana-ger kut hnu hmuh tur a tam hle.
Minute lina lekah Patrick van Aanholt laka Raheem Sterling penalty hlawhchhuah chu Sergio Aguero-a'n a pet goal nghal. Awlsam taka City chak mai tura ngaih theih an nih laiin Jermain Defoe-a'n Sunderland tan minute 71-naah a sut. Manager thar David Moyes-a'n point hmuh tumin goal khungtu Defoe aiah defender Paddy McNair a dah lut a, Manchester United aṭanga Black Cats zawmtu defender hian minute 87-naah an lamah tilutin City chakna goal a khung.
England keeper Joe Hart aiah Willy Caballero thlan a ni a, inkhelh banah Pep-a'n Euro 2016-a khel ṭha lo City keeper nen inhmuhthiam lohna an neih loh thu sawi mah se Hart-a hmalam hun a thim. Dam ṭha reng chungin midfielder Yaya Toure leh defender Eliaquim Mangala te chu squad-ah telh an ni lo a, defence laiah player thar John Stones leh wing back Aleksandar Kolarov te an awm avangin French defender Mangala tan hmun a awm tawh loah a ngaih theih. City tan inhliam vangin Vincent Kompany, Samir Nasri, Nicolas Otamendi bakah player thar Leroy Sane leh Ilkay Gundogan te an la inlan thei lo.
City hi harsa takin chak mah se an ball possession neih zat chu 77% daih a ni pha a, Sunderland-in vawi 102 lek an in pass dik laiin vawi 578 zet an in pass dik bawk. Spanish manager Pep Guardiola chuan, "Mi zawng zawng tan Premier League a harsa vek a, amaherawhchu kan khelh dan ngai renga kan khelh theih avangin chak phu zawk kan ni. Bul kan ṭan chauh a, player tharte pawh khelpha tura an ṭan a ngai vek. A hmasa berah chuan point thum hmuh hi a pawimawh a, kan khelh dan hmang kan rin ngam hi a ṭul a ni," tiin bul an
ṭan chauh thu a sawi.
Manchester City hian Cham-pions League qualifier first leg-ah Steaua Bucharest chu Thawhlehni zan hian Romania-ah an hmachhawn dawn a, Inrinni zanah Stoke City an tlawh ang. Sunderland erawhin Pathianni zanah kai thar Middlesbrough an mikhual thung ang.