Manchester City an inlar leh ta

Premier League champion lai Manchester City chuan an zia an chhuah leh ta, talbuai lai deuh nei mah se an buai reng dawn lo tih chu a takin an lantir - Pep Guardiola naute hian Ipswich Town chu 6-0 in an sawp.

Portman Road-a inkhelah Man City tan Phil Foden a hmuhnawm, England international forward hian goal hnih a khung bakah Mateo Kovacic tan a siamsak bawk a, a ke aṭanga ball chhuak a kaltluang leh ta hle.

Jeremy Doku leh substitute James McAtee te bakah striker ṭha Erling Haaland-a goal kan hmu bawk; midfielder ṭha mi Kevin de Bruyne chuan nuamti takin a khel - Foden leh Doku te tan a siamsak.

Man City hi nikum November leh December thlaah khan an talbuai, league nomawi an kawl lai pawh an hloh fel tawha ngaih theih a ni hman, mahse tun hnaiah rawn harh thar lehin beiseina an nei thar leh ta.

An match hnuhnung paliah vawi thum an chak a, goal 14 khungin anmahni lamah goal thum chauh a lut - tun hma lama an ṭhat vanglai ang tak kha ni rih lo mah se theihna nei sang bik an ni tih chu a takin a lang.

City manager Guardiola chuan, "Hun rei tak chhung chu kan duh angin kan khel lo, kan chet ṭhat loh chu hunin liam pui se la. A pawimawh zawk chu ṭha taka khelh theih a ni a, rang leh dik zawkin thutlukna kan siam thei kha a lawmawm.

"Kan ṭhat dan ber chu a la ni lo, chutihrualin hma kan sawn tih a chiang a, kan ṭhat dan tak kan hlat tawh lo tih ka sawi thei bawk. Ka naute khan kan nihna ṭhenkhat chu an rawn ti fiah a, tun hi kan thawh chhuah bul ṭanna a nih ka beisei," a ti.

Premier League hmahruaitu Liverpool lakah Man City hi point 12 zetin an hniam a, match khatin an khel tam bawk - nomawi beiseina a sang tawh lo. A sang zual pali zinga tel ringawt pawh thil awlsam a ni lo a, season thara Champions League khel tum inel pawh a ngaihnawm dawn hle.