Quarterfinal-ah Sinner a lut

Jannik Sinner chuan Australian Open nomawi a kawl lai humhim ngei a tum ruh hle, nimin chawhnu lam khan inkhel hmuhnawm takah Holger Rune chu 6-3, 3-6, 6-3, 6-2 a hnehin quarterfinal a in vaw kai.

World number 1 Sinner-a'n Rod Laver Arena chu atan hmun nuam a nih thu a sawi a, nuam a ti chhunzawm zel - Denmark tlangval Rune hneh tur hian darkar thum leh minute 13 chhung hun a hmang.

Nimina Melbourne khawpui lum zawng kha 32C a ni a, an ramah nipui lai a nih miau avangin khua a lum - India ram nena khaikhin chuan lum tak a ni hran lo, mahse Europe leh USA lama cheng ṭhin tan chuan tawrh har khawp a ni.

Kum 23 mi Sinner chuan, "Boruak avangin rilru paukhauh a ngai tih ka hre lawk a, a nihna takah chuan tun match bik phei hi chu taksa sawizawi lawk hmasa lem loin ka khel, vannei takin ka chak," tiin a sawi.

Sinner a nghet

Boruak lum tak hnuaia inkhel an nih avangin result tur hriatthiam a harsa, tennis ball mai bakah khaw lum an hmachhawn tel tih hriat a ngai, chutiang karah chuan Sinner a dingnghet tlang.

Italian tlangval hian a match lehpekah chuan Alex de Minaur leh Alex Michelsen te inkhela chak zawk a hmachhawn leh ang, nizan khan player pahnih hi an intawng zui a, result erawh kan hre hman lo.

Seeded pakhatna Sinner chuan, "Rei tak chhung match khel thei turin rilru ka siam, a chhan chu ka khingpui Rune kha tun hma lama ka hriatchian tawh a ni," a ti. Rune hian Danish player zinga Australian Open quarterfinal lut hmasa ber nih a tum a, mahse a ti hlawhtling thei ta rih lo a ni.

Sinner tan Australian Open chu hmun nuam a ni chhunzawm zel thung - tennis inelna a hmachawn hrang hrangah pawh a khel ṭha tluang, a zawnin match 17 a chak tling ta chiah; nikum October thlaa Carlos Alcaraz a hneh loh hnuah tlawm a la nei leh miah lo.

Tien a chak lo

Australian Open 2025 mipa singles huanga mipui barakhaih nasatu Learner Tien chu a zinkawng a tawp. Nimin last 16 inkhelah Tien hian Lorenzo Sonego chu 6-3, 6-2, 3-6, 6-1 in a ngam lo a, chak lo mah se atan tournament chhinchhiah tlak a ni.

Learner Tien hi a hmel lan danah Asian mi a ni tih a chiang, a nu leh pa chu Vietnam mi an ni - mahse a pianna hmun chu California niin an cheng zui a, infiamna huangah pawh US hmingin a khel zui, hriat a hlawhna pawh a ni chhunzawm.

Kum 19 mi chauh a la ni a, tun hmain hriat a la hlawh tam lo - US Open chu lo khel ve tawh mah se chak ni hmel a la hmu lo. Mahse, khawvelin a hmelhriat chian theih nan kumin Australian Open second round-ah khan Daniil Medvedev a hneh.

Italian mi Sonego tan zinkawng ngaihna a la ni chhunzawm ve thung, ani hian a match hmasa lamah Grand Slam vawi thum champion Stan Wawrinka a hneh thei a, a match lehpekah chuan Gael Monfils hnehtu Ben Shelton a hmachhawn leh dawn a ni.