Dani Olmo inhliam leh tawh

Barcelona-in season chawhnua an ziah luh loh ṭhelh, Spain National Sports Council-in ziah luh an phalsak leh tak Dani Olmo a tluang rei lo - a chawn hliam vangin zanin Champions League match-ah a inlan thei dawn lo.

Barcelona hian zanin dar 1:30-ah Benfica an lenchilh dawn a, Catalan club hian hnehna an chang a nih chuan inkhel dang result a zirin last 16 an lut chiang thei ang - match ruk an khelh tawhah vawi nga an chak.

Nipui transfer-a Barca pantu Olmo hian tun season inelna hrang hrangah Barca tan match 18 khel tawhin goal ruk a khung a, assist vawi thum a nei. Mahse, hliam leh a transfer chungchang fel lo neuh neuh avangin thawm a nei ngun hle.

Barca a zawm tirh khan Catalan club sum dinhmun fel lo avangin league match hnih a khel thei lo a, kumtira buaina avang khan match hnih a khel lo a, tuna a hliam hma hian hliam vangin ni 32 ngawt a lo chawl tawh bawk.