Martinez hoin Inter Milan an chak

Goal khung an harsat viau hnuah Lautaro Martinez a inlar a, goal hmahruai khungin a team Inter Milan chu Empoli lakah 3-1 in a chakpui - Inter hian Serie A nomawi an kawl lai humhim turin kawng dik an zawh.

San Siro-a inkhelah Inter Milan hian ball chang tamin hun ṭha insiam nual mah se khung an harsat, chawlhlawk hma chu mikhual Empoli an inveng tluan thei, a hnu lam erawh a harsa thung.

Minute 55-naah Nicolo Barella chuan Martinez tan ball a pe fuh a, goal aṭanga yard 25 zeta hla a la nih bakah a hmaah player an ding nual. Mahse, Argentine striker hian mawi lutuk in a pet kum a, keeper Devis Vasquez dan phak lohin a lut.

Inter an phur chhunzawm, Kristjan Asllani-a corner pet chu defender Denzel Dumfries chuan chiang zeta lo tauh lutin an hmahruaina a sawhnghet a, nuamsa angreng taka a chak thei tawh tur an ni.

Amaherawhchu, Inter Milan aṭanga loan hmanga Empoli zawmtu Sebastian Esposito chuan a club nghet zawk lakah goal khat khungin boruak a siam nung, a tawpah erawh Marcus Thuram chuan Inter chak a nemnghet ta thung.

Inter captain Lautaro Martinez chuan, "Kan match hnuhnung berah Bologna nen kan inhnehtawk a, point hnih kan hloh anga chhut theih a ni. Kan duh ang thlapa thil a kal loh hnuah hnehna kan chang ve leh ta.

"Empoli kha an inveng thiam em em a, a bik takin chawlhlawk hma khan engkim an ti dik emawni tih mai tur a ni. Mahse, beidawng loa kan nawr miau avangin a rah chhuah kan hmu," tiin a sawi.

Simone Inzaghi enkawl Inter Milan hi an league match hnuhnung 15 zetah an tlawm lo, an chunga awm Napoli an phak lohna chu point thum chauh a ni, match khata an khelh tlem zawk avangin an hmabakah an chak chuan an nihrual tawh ang.

Champion an tum thu sawi zuiin Martinez chuan, "Player naupang te ka nih lai aṭangin hmasawn duh mi ka ni, keimah chauh ni loin Inter Milan hian hma lam pan zel kan duh, chumi tur chuan kan thawkrim em em bawk.

"Match khelh kan ngah a, kan chau tlang tih pawh ka hria, chutiang kara team ṭha kan hneh thei hi ka ṭhiante chungah pawh ka lawm. Thawk kan la hlek ang a, chumi hnuah match hautak kan khel zui leh ang," tiin a sawi.

Italian champion Inter Milan hian Nilaini zanah Champions League an khel zui dawn, khualmualah Sparta Prague an lenchilh dawn a ni.