Keys lakah Rybakina a chak lo

Australian Open 2025 hmeichhe champion tura rinkai zinga mi Elena Rybakina chu Madison Keys hneh loin a tla - Keys hian nimin khan 6-3, 1-6, 6-3 a hnehna changin quarterfinal a in vaw kai ta zawk a ni.

Margaret Court Arena-a inkhelah, seeded 19-na Keys hian hun tam zawk chu inkhel a thunun; an intawn hnuhnung pahnihah chak lo zawk ni mah se, tun ṭumah chuan seeded parukna lakah kawng tinrengin a chungnung zawk.

Adelaide Open champion Keys chuan, "Tun hma lama kan intawn tawhna te uluk takin ka zir let a, a service hi a hmanraw hriam leh hlauhawm tak a ni tih ka hria, chumi lo hmachhawn thei tur chuan ka inbuatsaihna nasa hle.

"A pawimawh hmasa berah chuan a service leh ball rawn vuak hrim hrim lo vuak let dan tur kha ka ngaihtuah bawk. Harsa taka hnehna chan hi chu a hlu bik ṭhin," tiin a sawi.

Keys hian a match lehpekah chuan Elina Svitolina a hmachhawn ang. Inkhel dangah Ukraine nula Svitolina hian Veronika Kudermetova chu 6-4, 6-1 in a lo hneh ve bawk.