Gauff hnehtu Badosa

Australian Open quarterfinal-ah Coco Gauff a tla, a hneh loh chu Paula Badosa a ni - Spanish nula hian a vawi khat nan Grand Slam semifinal a lut, atan chanchin lawmawm leh chhinchhiah tlak bik a ni ang.

Nimin khan Rod Laver Arena-ah quarterfinal hi khelh niin, seeded 11-na Badosa hian darkar khat leh minute 43 chhungin 7-5, 6-4 in hnehna a chang; a zawna match 11 chak zawn thei Gauff a hneh tihna a ni.

Kum 27 mi Badosa chuan, "Ka tennis zinkawng hi a awlsam vek lo, a nihna takah chuan nikum kha he infiamna hi chawlhsan duhna hial ka nei hman. Tunah erawh khawvela a ṭha berte zinga mi ka hneh leh ta.

"Ka duhthusam ve ṭhinte kha a takin a thleng a, ka tan chuan major tournament semifinal thlen ngawt pawh hi a sang," a ti a, a thlen chin aṭanga hmasawn a tum tih a sawi bawk a, player ṭha dang hmachhawn turin a inringtawk bawk ang.

Seeded pathumna Gauff hi tun ṭumah hian rinkai berte zinga mi a ni. Season hmasa tawpah khan WTA Finals a la a, kuminah United Cup khelin singles match hoah a chak vek, beiseina sang tak nen Melbourne Park pan mah se a hlawhtling ta rih lo a ni.

Badosa hian a match lehpekah chuan Aryna Sabalenka a hmachhawn leh ang - nimin chawhnu lam inkhelah champion lai Sabalenka hian Anastasia Pavlyuchenkova chu 6-2, 2-6, 6-3 in a hneh a, a zawna vawi thum champion turin kawng dik a zawh.