Harsa takin Zverev a chak

Alexander Zverev chu Australian Open 2025 khelh laia mipa semifinal lut hmasa ber a ni - German tlangval hian nimin khan inkhel hautak takah Tommy Paul chu 7-6 (7-1), 7-6 (7-0), 2-6, 6-1 in a hneh.

Rod Laver Arena-a inkhel boruak a nung ṭha hle, seeded 12-na Paul hian set pahnihah 6-5 leh 5-3 a nih laiin a service a, a dinhmun ṭha viau mah se season hmang ṭhatu Zverev a dang thei lo.

Kum 27 mi Zverev hian darkar thum leh minute 28 chhungin hnehna a chang, a vawi thum nan Australian Open quarterfinal a paltlang; kum 2020 leh 2024 khan semifinal a lo in vaw kai tawh bawk a ni.

Seeded pahnihna Zverev chuan, "Set hnih a hniam zawk thei dinhmunah ka ding tih ka inhria, ka khel ṭha tawk lo bawk. Mahse, zawimuangin hma ka sawn a, set lina kan khelh tawh kha chuan duhthusam a ni thung.

"Ka tan chuan semifinal luh hi thil lawmawm a ni, ka hmabak chu engpawh ni se la theihtawpin ka bei ang," a ti. Semifinal-ah chuan Novak Djokovic leh Carlos Alcaraz te inkhela chak zawk a hmachhawn leh dawn a ni.

Tun season kal laiah Zverev a khel ṭha tluang hle, a zawnin match sarih a chak tawh - kumin bikah a la tlawm miah lo. Grand Slam semifinal vawi kua a lut tling ta chiah a, tuna player la inkhel lai zingah major title la si loa semifinal lut ngun ber a ni hial.

A hma lam thlir zuiin Zverev chuan, "Final ka leh theihna tur a nih phawt chuan ka tih theih zawng zawng ka ti ang. Engtik niah emaw chuan Grand Slam champion la ni ve ang tiin ka tuangtuah ṭhin, ka duhthusam hi a la danglam lo.

"Ka hmachhawn theih te hi an ṭha dun hle - Novak Djokovic hi major title la tam ber a ni a, sawifiah hran a ngai lo. Carlos Alcaraz pawh tennis a chawlhsan hunah meuh chuan Novak huanga awm thei tur a ni," a ti a, a hmaa ding thei pahnih a fak hle.