Arsenal-in Cunha an duh

Premier League champion tum Arsenal-in tlarhmaa khel tur player an thlithlai a, Wolverhampton Wanderers forward Matheus Cunha chu lakluh tumin an ngaihven niin khawthlang media-te chuan an tarlang.

Cunha hian tun season-ah league match 21 khelin goal 10 a khung tawh a, assist vawi li a nei bawk. Arsenal player zingah tun season-a league goal 10 khung tling tawh an la awm lo a, khung hnem ber Kai Havertz chuan goal riat a khung tawh.

Arsenal hi Premier League-ah pahnihna an ni mek a, pakhatna Liverpool chu point rukin an phak lo - match khatin an khel tam zawk bawk. Zanin dar 1:30 hian Champions League match khel turin Dinamo Zagreb an mikhual dawn.

Gunners hian UCL match rukah vawi li hnehna chang tawhin, vawi khat chiah an la tlawm a, table-ah pathumna an ni mek. London club tan top 8 ni turin chance a sang a, hei vang hian Mikel Arteta-a'n club nem zawk Dinamo lakah player a hahdamtir a nih pawhin a mak lo ang.

Arsenal hian Inrinni zanah league match an khel lehnghal dawn a, Cunha khelhna Wolves an lenchilh dawn - Arteta-a'n English champion nih a tum chuan heti lama rilru a pek deuh a ṭul dawn.