Rashford-a'n Man United tana khelh a inbeisei

Ruben Amorim hnuaia khelhna hmun chang lo Marcus Rashford chuan Manchester United tan a khelh theih a la inbeisei ve reng. English forward hian December 12 hnuah Man United tan a khel leh tawh lo a, thla khat chuang chu competitive match a khel thei tawh lo.

Rashford-a inlan hnuhnung ber hian Man United-in Europa League-ah Viktoria Plzen chu an hneh a, inkhelh banah Ruben Amorim-a'n Rashford-a training dan a sawisel.

English forward hi a inlan loh chhung hian ṭum khat chiah bench-ah a awm a, December 30-a Newcastle United 3-0 ngawta an hneh loh ṭumin bench-ah a ṭhu tluan.

Man United hian Pathianni zan khan Brighton chu an mualah 3-1 ngawtin an hneh lo a, inkhelh banah Amorim chu Rashford-a chungchang zawh a ni. Portuguese manager chuan, "A duh thlanna," tiin a chhang a, thlan tumna a nei loh tih ngaihdan a awm nghal.

Mahse, club lam erawhin Amorim hian thlan tumna a nei lo tih lam ni loin Rashford-a kutah engkim a awm tihnaah an ngai zawk. Rashford laina hnaite pawhin English forward hian United tana khelh a duh a, Amorim nen inhuatna hranpa an nei lo bawk. Thlan a nih phawt chuan Rashford hian United tan a khelh a duh a, a la beisei bawk.

Chutihrualin January transfer hunlai a nih miau avangin thuthang a tam a, Rashford pawh loan hmanga chhuak tura sawi a ni a, hei hi a thlen a la rinawm ber bawk. Rashford hi matchday squad-a tel a nih loh hnuah vawi engzat chiah nge first team squad zingah a training tih hriat a ni lo.

Manchester United hian January 23, Ningani zan dar 1:30 hian Europa League-ah Rangers an mikhual dawn. Vawiin hian training-na hmun Carrington ground-ah training ṭantirh minute 15 chhung media mite an awm thei dawn a, Rashford dinhmun a hriat theih ang.

Ruben Amorim hian thutlukna huaisen siamin Rashford hi training-na leh khelmual pawna a nungchang ṭhat tawk loh avangin a telh lo a, mah se an result a ṭhat phah lo. Premier League-ah phei chuan Man United hi table-ah 13-naah an awm mekin match 22-ah point 26 chauh an hmu. Europa League-ah erawh an ziaawm hret a, match rukah point 12 hmuin table-ah pasarihnaah an awm mek.