Golden State sawptu Boston Celtics

Steve Kerr-a'n a enkawl chinah Golden State Warriors chuan anmahni muala an tlawm chian ber ṭum an tawng - nimin zing NBA regulsr season inkhelah GSW hian Boston Celtics chu 125-85 in an ngam lo.

Player a nih laiin Kerr hian NBA nomawi vawi nga a chawi, kum 2014 khan Golden State hi a enkawl a, coach a nih hnuah vawi li a champion leh tawh bawk, sulhnu nei ṭha leh ropui berte zinga mi a ni.

Mahse, nimin zing inkhel bikah Warriors hian champion lai Celtics hi an ngam ngang lo, point 40 ngawtin an inthlau. Kum 1985 daih tawh khan Dallas Mavericks lakah point 45 ngawtin an lo hniam zawk tawh bawk.

Boston Celtics an chak theih nan Jayson Tatum chuan point 22 a nei a, ani bakah hian Kristaps Porzingis leh Jaylen Brown te chuan point 18 leh 17 nei bawkin Chase Center ngei maiah an chak chiang hle.

Warriors coach Kerr chuan, "Thil thleng hi theihnghilh nghal in tunah chuan Sacramento Kings nen kan inkhelh tur kan ngaihtuah nghal ang, kum tluanin inelna hautak hmachhawn tura inpeih a ngai," tiin a sawi.

Western Conference table-ah Golden State hi 11-na an ni mek, an dinhmun a ṭha vak lo tihna a ni. Boston Celtics erawh Eastern Conference table lamah pahnihna an ni, an chungah Cleveland Cavaliers chiah an awm.