Footballer hausa ber Lionel Messi

Nipui transfer-a Barcelona chhuahsan a tum avanga thawm nei na tak Lionel Messi chu Forbes chuan season hmasaa footballer zinga sum lalut hnem berah a puang a, Forbes chuan Messi hian kum khatah dollar maktaduai 126-a lalut niin an tarlang!

Messi hnuai chiahah hian Juventus forward Cristiano Ronaldo a awm a, khawvela footballer zinga fans ngah bera chhal ngam player hian kum khat chhungin dollar maktaduai 117-a hlawh chhuak. 

Paris St-Germain lama hun hmang mek Neymar chu pathumna a ni a, dollar maktaduai 96-a lalut - French club tana a khelhpui, player ṭhangduang Kylian Mbappe chu palinaah a awm thung a, dollar maktaduai 42-a thawk chhuak. 

Footballer sum lalut hnem top ten zingah hian Gareth Bale a la lang cheu a, Welsh forward hian khelmualah hun hmang tam lo mah se a la hlawh hnem miau avangin pariatnaah a lang phak. 

Messi-a'n season liam taah dollar maktaduai 126 zet a lakluh avang hian a career chhungin dollar tluklehdingawn a thawk chhuak tawh tihna a ni e, footballer zinga dollar tluklehdingawn thawk chhuak hmasa ber Cristiano Ronaldo kiangah a awm ve ta. 

Kum 33 mi Messi hian a hlawh aṭang ringawtin kum khatah dollar maktaduai 92-a lalut a, fakna leh sumdawnna aṭangin dollar maktaduai 34-a hlawh phak bawk - a nep lo hle. 

Barcelona-ah kum khat dang tal chu a la cham dawn tih a chian avangin a tlem berah dollar maktaduai 92 chu a lalut leh dawn tih a chiang a, nakkum lamah pawh a chung bera a awm chhunzawm a nih pawhin a mak lo ang. 

Messi hian sumdawnna lamah adidas chu ball boot lamah contract a neihpui a, anni bakah hian Pepsi, Budweiser leh OrCam Technologies-te chu a thawhpui langsar zual an ni - dollar maktaduai 100 chuang lalut awm reng a ni. 

Kum 35 mi a ni tawh chungin Ronaldo chu footballer sum lalut hnem pahnihna a la ni phak a, Portuguese forward hi football khawvelah chuan hralh a la tla hle tih a lang chiang. 

Ronaldo hian sumdawnna lamah pawh Messi khumin dollar maktaduai 47 ngawt a la lalut a, mahse khelmuala an hlawh lamah erawh Messi-a thlau deuh - Juventus-ah hian kum khatah dollar maktaduai 70-a hlawh. 

Social media lama mi maktaduai 457 zetin an 'follow' avangin Ronaldo hi infiamna khawvela mi lar ber ang hiala ngaih a ni a, Nike nena an thawh hona langsar tak piahlamah Herbalife leh Clear shampoo nena an thawh hona te chu a langsar zual a ni.

Ronaldo hian khelmual lamah Ali Daei hnung zuiin international football-ah goal 100 a khung tling a, khelmual lama a result a ṭhat chhung chuan sum lalut hnem lamah hian a lang zel ang. 

PSG forward Neymar-a'n Messi leh Ronaldo ang emin sumdawnna lamah sum lalut hnem lo mah se kum khata dollar maktaduai 78-a hlawh chuan pathumna dinhmun a luahtir a, Nike chhuahsana Puma nena thawkdun tura inrem Neymar hian sumdawnna lamah dollar maktaduai 18-a lalut mek bawk. 

Kum 21 lek la ni mah se khelmual leh sum lakluh lamah chuan Mbappe-a nau lo hle - French striker ṭhangduang hian kum khatah dollar maktaduai 28-a hlawh phak a, sumdawnna aṭanga a sum lakluh dollar maktaduai 14 pawh a tenau lo. 

Real Madrid tan khel phak lo mah se Gareth Bale-a'n kum khatah dollar maktaduai 23-a hlawh phak miau a, sumdawnna lama a sum hmuh dollar maktaduai ruk nen footballer sum lalut hnem zingah pariatna a la ni phak. 

Bayern Munich tana treble nomawi chawitu Robert Lewandowski chu pakuanaah a lang phak a, kum khatah dollar maktaduai 28-a lalut. Barcelona forward Antoine Griezmann-a'n Nou Camp-ah beisei phak lo mah se kum khatah dollar maktaduai 33 zet a la lalut phak bawk. 

Football khawvela sum tamna league Premier League aṭanga player lang sang ber chu Mohamed Salah a ni a, Egyptian forward hi pangana ni phakin a chungah Messi, Ronaldo, Neymar leh Mbappe chiah an awm. 

Liverpool forward Salah hian season khatah dollar maktaduai 24-a hlawh a, sumdawnna aṭangin dollar maktaduai 13-a lalut bawk - a hnuai chiahah hian Manchester United midfielder Paul Pogba 

a awm. 

Pogba hian season khatdah dollar maktaduai 28-a hlawh mek a, sumdawnna aṭanga a sum lakluh dollar maktaduai ruk hi top ten-a lang ve dang te laka chhuan viau tur ni lo mah se khelmual lama a hlawh hnem miau avangin parukna a ni phak. 

Premier League player zingah Manchester United goalkeeper David De Gea lang ve lehin 10-na a ni phak a, Spanish keeper hian sumdawnna aṭangin dollar maktaduai thum chauh lalut mah se kum khata a hlawh dollar maktaduai 24 nen top 10-a lan nan a tawk. 

Forbes-in player sum lalut hnem a thlanchhuahte hi an rinthu leh ngaihdan maia siam ringawt an ni lo a, uluk taka zirchianna neih a nih hnuah footballer sum lalut hnem top 10 hi puan a ni. 

American business magazine lar hian USA leh Europe lama inkulh club, player agent, commercial sponsor leh football expert-te an be rawn a, anni hian player-te hlawh zat, inremna an neihpui dan leh thil dang dang an lo hrilh. 

Heng zawng zawng hi a tawpah belhkhawm lehin Forbes hian footballer, sum lalut hnem top 10 hi a ti chhuak ta a, hriat tel tur chu sum hi an lakluh ngawr ngawr niin transfer fee tih vel a tel lo. 

Hemi piahlamah hian chhiaha an sum chawi tur zat chhut tel a ni lo bawk a, a tawi zawnga sawi chuan Messi hian dollar maktaduai 126 aṭang hian chhiah a la pek leh dawn avangin a bank account lama sum lut chu hemi ang chiah chiah hi a ni kher lo ang. Footballer sum lalut hnem top 10

1    Lionel Messi    Barcelona/Argentina    $92m/$34m    $126m

2    Cristiano Ronaldo    Juventus/Portugal    $70m/$47m    $117m

3    Neymar    PSG/Brazil    $78m/$18m    $96m

4    Kylian Mbappe    PSG/France    $28m/$14m     $42m

5    Mohamed Salah    Liverpool/Egypt    $24m/$13m    $37m

6    Paul Pogba    Manchester United/France    $28m/$6m    $34m

7    Antoine Griezmann    Barcelona/France    $28m/$5m    $33m

8    Gareth Bale    Real Madrid/Wales    $23m/$6m    $29m

9    Robert Lewandowski    Bayern Munich/Poland    $24m/$4m    $28m

10    David de Gea    Manchester United/Spain    $24m/$3m    $27m