Wolves an chak nghal

Season hmasa Premier League-a team hmuhnawm pawl Wolverhampton Wanderers-in anmahni ang thoa beisei phak baka season hmang ṭha Sheffield United chu khualmualah 2-0 in an hneh a, point thum nen Premier League bul an ṭan. 

Wolves tana goal khung hna thawktu pawh season hmasa inelna hrang hranga goal 27 khungtu Raul Jimenez bawk a ni a, Mexican striker hian minute thumna lekah goal hmahruai a khung. 

Sheffield an insiamrem hman lo - Romain Saiss chuan goal hmahruai an khung aṭanga minute thumna lekah a rawn khung ve leh a, hun tawp thlenga goal dang lut tawh loin Wolves hi 2-0 in an chak. 

Pathiannia Wolves-a kum 2023 thleng cham tura contract thar ziaktu coach Nuno Espirito Santo-a'n chak result nen a contract thar a lawm a, mahse Portuguese coach hian an inkhel leh tur bak a thlir lo. 

Nuno chuan, "Training session leh tur atan inbuatsaih a ngai a, League Cup-ah Stoke City kan hmachhawn dawn a ni. A tah tawl zelin kan kal ang," a ti. 

Wolves hian Ningani zan dar 11:30-ah League Cup second round match hi an khel dawn a, Premier League club hlun ṭhin, Championship-a khel mek Stoke City nen an inhmachhawn ang. 

Sheffield United boss Chris Wilder chuan, "Kan rinna hi kan rilru zawng zawng kan pekna chu a ni. Insiamṭhat ngaihna kan nei a, kan beisei result nei turin theihtawp kan chhuah chhunzawm dawn a ni," a ti. 

Wilder-a enkawl Sheffield hian Wolves ang thoin Ningani zanah League Cup an khel dawn a, zan dar 10:00-ah Premier League club ve tho Burnley an lenchilh ang - a harsa dawn.