Premier League-ah Covid-19 kai thar pali awm

English top flight football lamah pawh Covid-19 in zia lam a la pan thei lo a, test neih hnuhnung berah mi paliin Covid-19 an kai tih hmuhchhuah a ni. 

September 7 - September 13 inkar khan Premier League club player leh staff 2,131 zet chu test hi neih a ni a, an zing aṭang hian mi paliin Covid-19 an kai tih an hmu chhuak. 

Mi palite hi UK sorkar danin ni 10 chhung an inkhung hrang dawn a, Premier League chuan, "Club leh mimal hming kan puang dawn lo a, mahse test neih zawh rualin result erawh vantlang hriat turin puan zel a ni ang," an ti thung. 

Premier League hi September 12 aṭang khan khelh ṭan a ni leh tawh a, Covid-19 vanga chawlh reng a nih hnua June thlaa khelh ṭan leh a nih aṭang khan khelmuala entu awm loin an la inkhel zel a ni.