Khawvela tlan chak ber Usain Bolt

Usain Bolt chu Olympic 100m intlansiak gold medal vawi thum la thei hmasa ber a ni ta! Jamaican sprinter ropui hian Rio Olympic neih mekah American Justin Gatlin lehpêlin pakhatna a ni.

Kum 29-a upa Bolt hian kumin hi atan Olympic hnu-hnung ber a nih tur thu a lo sawi lawk tawh a, nimin zinga an intlansiak hi 100m a tlan tawp ber tur a nih tawh avangin khawvelin an thlir rawn. Bolt hian second 9.81 chhungin a tlen thleng a, pahnihna Gatlin nen an inthlauhna chu second 0.08 chiah a ni.

Canadian sprinter Andre de Grasse chuan 100m a tlan ṭhat ber ṭum tawngin second 9.91 a hmang thung a, an ram tan bronze medal a hlawh chhuak. Bolt-a teammate Yohan Blake chu palina a ni thung.

Beijing 2008 leh London 2012 a hnehna a lo chan tawhna 100m a goal medal pathumna la tur hian intlansiak ṭan tirhah Bolt a tlan fal nghal lo a, a laihawlah a awm. Mahse, ṭum danga a lo tih ṭhin tawh danin 60m vel aṭanga rawn dawk chhuakin hnehna changtu ni turin a tawp dawn teah hma a rawn hruai zawk a ni.

Rio Olympic-ah hian 200m leh 4x100m relay-ah te Bolt hi a la inlan chhunzawm dawn a, heng inelna pahnihah te hian Beijing leh London-ah khan hnehna a lo chang tawh bawk.

Bolt chuan, "Mi ṭhenkhat chuan hneh theih loh ang maiin min sawi ṭhin mah se inelna pahnih ka la hmachhawn dawn avangin he thu hi chu a dik famkim lo," tiin intlansiak hmabak pahnih a la neih avangin a ṭawng fimkhur hle.

Kum 34-a upa Gatlin tan Olympic hnuhnung ber a ni ve tawh bawkin a rinawm a, khawvela tlanchak ber pawl ni chung siin Bolt a vanglai nen an hun a intawn avangin a ropui tur ang a ni phak loah a ngaih theih. American sprinter hian Athens 2004-ah khan 100m gold a dawng a, kum 2006 World Championship-ah khan 100m leh 200m-ah pakhatna ni mah se damdawi hman phal loh a hman avangin kum li chhung hrem a ni.

Kum 2010 khan infiamna khawvelah lo kir lehin London 2012-ah khan bronze medal a la, 2015 World Championship Bolt a tluk lo thung. Thla hmasa khan second 9.80 chhunga 100m a tlan thlen theih avangin Rio-ah hian pakhatna ni thei tura ngaih a ni. Mahse, inelna tak tak neih a nih meuh chuan Bolt bawk a chungnung zawkah a ṭang leh ta.

Kum 2008 aṭang khan Bolt-a'n Olympic leh World Cham-pionship-a gold medal a lak tawh zawng zawng belhkhawm chu 18 zet a ni tawh a, infiammi ropui an sawi apiangin Muhammad Ali, Pele leh Michael Jordan te nen Bolt hming hi an lam ri ve zel tawh ang.