Joe Hart dinhmun a chiang lo

Pep Guardiola en-kawl-na hnuaia insiam-
ṭhat tum Manchester City-in Premier League-a an match hmasa berah Sunderland 2-1 in an hneh a, bench-ah goalkeeper Joe Hart dah a nih avangin titi a tam hle. Guardiola ngeiin a keeper hi khelhna hmun a chan loh vanga a lungawi loh thu a pha lo.

Spanish manager chuan, "Kan khelh leh turah chuan keeper lut ka thlak danglam mai thei a, thlak lo mai thei bawk. Tun dinhmunah chuan keeper che rang tak ka mamawh a, Willy Caballero kha chu vanga khelhtir ka ni. Joe Hart hi player class sang tak a ni a, Willy tih theih ang hi a thei lo ang tihna a ni lo," a ti.

Khawthlang media te chuan Joe Hart hi Everton nen an sawizawm leh der tawh a, City hian Barcelona goalkeeper Claudio Bravo chu lakluh an in beisei niin an tarlang bawk.

Season hman zawh taka Premier League palina Manchester City hian Champions League playoff-ah Steaua Bucuresti chu zanin dar 12:15 hian an lenchilh dawn a, August 24 zanah Etihad Stadium-ah an mikhual ve leh ang.