Britain tan Murray a ropui e

Andy Murray chuan Juan Martin del Potro hnehin Rio Olympic mipa tennis singles champion a ni. Great Britain fapa rangkachak hi Olympic tennis chanchina vawi hnih gold medal la thei hmasa ber a ni bawk.

Pathianni zana final inkhel hi an inhnehtawk takzet. Centre Court-ah darkar hnih leh minute hnih zet an inbeih hnuah world number 2 Murray hi 7-5, 4-6, 6-2, 7-5 in Argentina tlangval lakah a dingchang ta zawk a ni.

Kum 29-a upa Murray hian 2012 London-ah khan gold a lo la tawh bawk a, kumina a hlawhtlin leh chiah hian tennis player ropuite la tih theih ngai loh Olympic mipa singles-a vawi hnih champion thei hmasa ber dinhmun a rawn luah.

Grand Slam vawi thum champion tawh Murray hi a khel ṭha tluang rih hle a, chawlhkar nga chhung ngawt hneh loh nei loin a kaltluang tawh, heng hun chhung hian Olympic bakah hian Wimbledon title pawh a vawi hnih nan a la tel nghe nghe.

Inkhel hautak a nih thu sawiin Murray chuan, "Engtiang chiaha inkhel harsa leh hautak nge a nih tih chu keini pahnih chauhin kan hre thei ang. Hetiang huna dinhmun ṭha zawka ka ding thei hi ka lawmin infiamna khawmpui lian bera kan ram tana medal ka la thei hi ka inchhuang hle," a ti.

Murray chuan sawi chhunzawmin, "2012 London nen kha chuan a danglam tawh hle a, kum li chhungin thil thleng a tam tawh em avangin khaikhin chi pawh a ni lo. Olympic lo awm leh tur Tokyo-ah chuan kum 33-a upa ka lo ni tawh dawn a, ka inlan theih dawn leh dawn loh sawi lawk a harsa tawh," tiin a sawi.

Chak lo zawk, kum 27-a upa Del Potro hi ban rek na vangin buai ngun deuh mah se a dan ṭhat phawt chuan player hlauhawm berte zinga mi a ni reng. London-ah khan bronze medal a lo dawng tawh a, Rio-ah pawh hian a match hmasa berah world number 1 Novak Djokovic a hneh-in semifinal-ah 2008 Olympic gold medalist Rafael Nadal a hneh bawk.

Pathumna Japan

Bronze medal in-chuh-na inkhelah Japan tlangval Kei Nishikori chuan Grand Slam vawi 14 champion tawh Rafael Nadal chu 6-2, 6-7 (1-7), 6-3 a hnehin a vawi khat nan Olympic-ah medal a dawng ve ta.

Kum 26-a upa Nishi-kori hian tun hmain Olympic-ah quarterfinal a la kal pel ngai lo, kuminah semifinal thlengin Andy Murray hneh lo mah se Spain tlangval lakah hnehna a chan zui theih avangin a dai ngai loh ram a dai theih phah a ni.