German Super Cup Bayern-in Dortmund an hneh nghal

Bundesliga ṭan hmaa khelh ṭhin German Super Cup-ah Bayern Munich-in Arturo Vidal (58') leh Thomas Muller (79') te goal hmangin Borussia Dortmund an hneh a, Italian manager Carlo Ancelotti hnuai-ah nomawi an chawi nghal. Thomas Tuchel-a kaihhruai Dort-mund hi Bayern elpha tur ber a ngaih a ni a, Bundesliga-ah season li chhung a zawna champion tawh Bavarians-in ro an rel leh turah a ngaih theih.

Neuer-a ropui

Signal Iduna Park-ah Bayern Munich hian hnehna chang mah se khelmual chhungah erawh an chungnung bik lo. Copa America Centenario-a Chile champion puitu Vidal leh German forward Muller te goal khungnaah hian man of the match chu keeper Manuel Neuer a ni. Germany keeper Neuer a lansarh avangin season ṭan hmaa Manchester United sawptu Dortmund hi dah hniam theih erawh an ni lo.

Dortmund tan Pierre-Eme-rick Aubameyang leh player thar Ousmane Dembele te'n goal an khung teuh hle a, Bayern defender Mats Hummels chu an club hlui an hneh theihna kawngah a ṭangkai hle. Bundes-liga champion tan hian Arjen Robben, Douglas Costa leh Jerome Boateng te chu an la inlan lo.

Bayern hian Pep Guardiola hnuaiah Super Cup vawi khatmah an chawi lo a, tun ṭum hi kum 2012 hnua an vawi khat chawi lehna chauh a ni. Bavarians tan Super Cup nomawi vawi nga an chawina a ni a, Dortmund record an nih rual chiah.

Ancelotti thukhawchang

Kum 57-a upa Carlo Ance-lotti chuan, "Dortmund an khelṭhat em avangin inkhel harsa tak a ni. Amaherawhchu halftime zawhah erawh kan che ṭha a, Bundesliga atan inrintawkna kan neih phah khawp ang. Tunah chuan kan team hi season ṭan turin kan inpeih tawh a ni," tiin a sawi.

Bundesliga season hi Au-gust 26, Zirtawpniah ṭan a ni dawn a, Bayern-in an match hmasa berah Weder Bremen an hmachhawn ang.

DFL Super Cup

Kum Champion

2010 Bayern Munich

2011 Borussia Dortmund

2012 Borussia Dortmund

2013 Bayern Munich

2014 Bayern Munich

2015 Bayern Munich

2016 Bayern Munich