Bastille Day-a thite Nice-in a hre reng

Nice chuan Ligue-1 a an match hmasa berah July 14-a Bastille Day lawmnaa firfiak beihna avanga thi mi 85 hriatrengna hun an hmang. Thla hmasa lawk khan Promenade des Anglais-a Bastille Day lawma pungkhawm mipuite chu firfiak pakhatin motor hmangin a bei a, mi 85 su hlumin mi 300 tehmeuhin hliam an tuar a ni.

French club player-te hian t-shrit var hain an kawr hmalamah mi 85 thi ta te hming hi a inziak a, stadium-a pungkhawm fan-te pawhin kawr var hain an khingpui Rennes lam pawhin an kawrah thi ta te hming hi an ziak ve bawk. He inkhelah hian Nice chuan kum 17 leka upa Malang Sarr goal khung hmangin 1-0 in hnehna an chang a ni.

Pathianni zan Ligue 1 inkhel dangah Lyon chuan 3-0 in Nancy an hneh a, Marseille leh Toulouse chu goal khung loin an inhnehtawk bawk. Zirtawpni zan khan Ligue 1 hi khelh ṭan niin champion lai Paris Saint Germain chuan 1-0 in Bastia an hneh a, Monaco leh Guingamp chu 2-2 in an inhnehtawk bawk.