Kolkata tan Helder Postiga inlan dawn

Atletico de Kolkata chuan season hmasaa an player lo ni tawh Portugal international hlui Helder Postiga chu tun season-a an tana khelh chhunzawm turin an lalut leh ta.

Kum 34-a upa striker hian season hmasa khan Deportivo de La Coruna aṭangin Kolkata club hi a lo zawm tawh a, a match hmasa berah goal hnih khung mah se a inhliam zui avangin ISL-ah a inlan chhunzawm tawh lo.

Porto striker hlui hian ISL zawh hnuah January khan Rio Ave FC a zawm a, Portuguese Primeira Liga club tan hian league match 10 inlanin goal nga a khung sak leh hman a ni.

Hetihlai hian Kerala Blasters chuan Haiti international Kervens Belfort an lalut ve bawk. FC Sion striker hlui hian Copa America khelh zawh takah pawh khan an ram aiawhin minute 138 chhung khelmualah hun a hmang.