Hri leng kara khelh US Open 2020

Buaina leh harsatna hrang hrang karah US Open 2020 chu khelh zawh a ni a, season dang ang bawkin New York khawpuia inelna lian hian thil chhinchhiah tlak tak tak a rawn herchhuahpui rualin, thleng lo zawk tura duhawm tak thleng lawi si pawh a awm.

Dominic Thiem leh Naomi Osaka ten mipa leh hmeichhe singles nomawi an chawi a, champion tura rinkai Novak Djokovic hnawl a nih dan leh tualchhung nula chhuanvawr Serena William tlak dante chu chanchin ngaihnawm a tling.

Engkim famkim leh ṭha taka kalpui vek theih a nih lohzia chu hriat sa a ni. Covid-19 boruak leng vel karah United States Tennis Association (USTA) chu an dinhmun ngaiah an dingnghet tlat a, season tira ruahmanna an neih hun pangngaiah tournament an buatsaih thei a ni.

March thla chawhnu lam aṭang khan khawvel pumah tennis inelna pangngai chu chawlh lailawk vek a ni. May thlaa khelh tur French Open chu September-a khelh turin an sawn, clay court season awm lo tur kha an ngai ngam lo.

June a rawn her chhuak a, grass court season hman hun a ni. Roger Federer-a'n nghakhlel taka a lo thlir Wimbledon chu Indopui II-na hnua a vawi khat nan ṭhulh a ni - All England Lawn Tennis Club thutlukna ang hian grass court inelna a awm lo zui bawk.

USTA-in ruahmanna an siamsa an ti danglam lo a, a hun ngaiah tournament an kaltlangpui. Coronavirus vangin stadium chhungah entu an awm thei lo mai a ni lo, player-te pawhin team member an neih zat tur bituksak a ni - US khawpuia an luh hnuah pawh hmun khatah an awm khawmtir.

US hi hri leng tamna hmun a ni a, a bik takin inelna neihna hmun New York khawpui chu a hluarna hmun a ni. Player tam tak chu inkhel turin an zin lut ngam lo, champion lai Nadal leh Bianca Andreescu te meuh pawh an inlan lo.

A bikin hmeichhe player ten an hlau zual niin a lang, hmeichhe ranking sang zual 10 zinga paruk ngawt an inhnukdawk! Mipa world number 1 Djokovic erawhin, "Tennis infiamna awm zel tur atan pawh kan khelh ngei hi a ṭha a ni," tiin a sawi thung a, inkhel turin US a pan.

Pa dangdai leh chanchin ngah ve tak a ni a, a elpui Federer leh Nadal an inlan loh avangin Djokovic tan Grand Slam title lak belh theihna kawng a inhawng zau hle - nomawi chawi tura rinkai ber a ni bawk. Mahse a duh leh beisei ang vekin thil a kaltluang bik lo.

Last 16-ah Djokovic hi Pablo Carreno Busta nen an inhmachhawn a, set khatna pawh an khel zo hman lo. Serbian tlangval hian a iptea a ball ah lai chu la chhuakin a hnung lamah a vaw phei a, ball hian line judge hrawkah a per - a ball vuak danah tihpalh ni loin tih luih a nih avangin an ti tla nghal.

World number 1 hian a thil tih avang hian ngaihdam a dil zui nghal a, chutihrualin tennis zinkawnga a theih-nghilh ngai tawh loh tur thil thleng hi a pawi tur angin a pawi zo tawh. Pawisa a dawn tur chu chawi lettir a ni thung, ranking point a hmuh tur ang pawh a hmuh belh lo.

Djokovic chuan, "Khatiang thil a thleng kha a pawi, hringnunah hian thil ṭhenkhat chu paih bo mai theih tawh loh tura thil thleng a awm. US Open-a ka thil tih pawh kha ka theihnghilh theih ka ring tawh lo. Tournament zinkawng tihtawp dan ṭha lo tak chu a ni.

"Amaherawhchu ka thil tih kha tihpalh a ni a, hnung lama ball vuak phei chang hi chu a awm ṭhin. Nidang aiin ka vaw na palh a, vanduai thlak takin judge a va fuh leh zel bawk," tiin tun hnai khan a sawi chhuak leh, a thil tihah a inchhir tih a sawi bawk.

Djokovic a tlak takah chuan - Pablo Carreno Busta, Daniil Medvedev, Denis Shapovalov, Dominic Thiem, Alexander Zverev, Borna Coric, Andrey Rublev leh Alex de Minaur te an la dam a, an vai hian Grand Slam nomawi la chawi ngai lo vek an ni.

Grand Slam final vawi thum khel tawh, mahse la champion ngai lo Thiem-a'n semifinal-ah season hmasa finalist Medvedev a hneh a, final-ah a ṭhianpa Zverev a hneh zui leh bawk. Austrian tlangvalin hun rei tak a lo nghah tawh chu a takin a rawn thleng dik ve ta.

US Open thlirkirin Djokovic chuan, "Dominic khan nomawi a phu takzet, a rilru a tluangin hlawhtlinna chang tur hian a thawkrim em em bawk a ni. Tun hnaiah uiawm tak takin nomawi a la phak lo ṭhin, tunah erawh a phu ang ngei a hmu hi ka lawmpui.

"Player dangte pawh khan champion an phu tehmeuh mai, chutihrualin ngun taka chhut chuan Thiem khan midang zawng aiin a phu berah ka ngai," a ti. Australian Open final-ah khan Novak hian Thiem hi a lo hneh tawh.

Tun kar chhunga khelh tur Italian Open-ah Thiem hi a inlan dawn lo a, September 21 aṭanga khelh tur French Open erawh final vawi hnih a luh tawhna a nih avangin champion tura rinkai zingah a tel ang - season dang aiin inrintawkna pawh a nei sang zawk ngei ang.

Serena Williams hi tennis player piang tawh zinga ropui leh hlawhtling berte zinga mi a ni. American star hian Grand Slam chawi hnem ber Margaret Court (24 titles) nih rual turin vawi khat champion chauh a hmabak tawh.

World number 1 hlui hi kum 38 mi a ni tawh a, a theihna en chuan nomawi lian tham chawi leh mai hi thil harsa vak lo tura ngaih a ni. Mahse Grand Slam final a khelh hnuhnung paliah a chak lo, tun ṭumah hian semifinal-ah a tla. French Open khelh chhunzawm a tum ang.

Ṭum hnih ngawt a chawlh hnuah Kim Clijsters a rawn kir leh. Belgium star hian beisei phak lo mah se kum upat lamah pawh ṭha takin a la khelh theih tih a lantir. Fa nei tawh Serena, Victoria Azarenka, Tsvetana Pironkova leh Victoria Azarenka ten quarterfinal an lut phak.

Hmeichhe inelna huangah hian tournament khelh hma aṭanga rinkai Osaka a hlawhtling ber a, Japanese nula hian 2018 khan Serena hnehin US Open-ah hian nomawi a lo chawi tawh bawk, hard court bikah chuan player hlauhawm a ni tih a nemnghet.

Sawisel tur leh fuh tawk lo lai awm mah se hripui leng kara US Open khelh theih a ni hi a lawmawm, thla nga chuang tennis an chawlh hnua tournament a awm leh hian player bakah he infiamna ngainatute tan rah ṭha a chhuah ngei a rinawm.