I Day Football 2016 Ramhlun North aiin Aizawl FC vannei!

Second 10 awma an si phurh sûttu Aizawl FC-in MPL kaithar Ramhlun North chu penalty shootout-ah an hneh hram a, Independence Day Football-ah an champion.

Aizawl FC hian inchhuanna tur nei lo mah se K. Malsawmkima hoten chak duhna thinlung an neih len avangin I Day Football-ah a kum zawnin an champion.

Final en turin Lammual khat mipui an pungkhawm a, nimin tlai inkhel hmuhnawm takah Ramhlun North FC-in Lalruatfela hmangin goal an khung hmasa zawk. Injury time-ah Aizawl FC-in Bright Middleton Mends hmangin an sut hram. Extra time-ah goal luh belh tawh loin penalty shootout-ah 7-6 in hnehna an chang.

Tawnhriat neite

Ramhlun North FC-in semifinal an thlen theihna atan goal pawimawh khungtu B. Malsawmzuala hremna hlih a ni a, tawnhriat nei ṭha forward hi a club hlui hmachhawn turin David Lalrinchhana aiah luhtir a ni. Coach Lalruatliana Sailo-in Chanmari FC hneh team aṭangin player pakhat chiah a thlak.

Aizawl FC coach Mala'n Shillong Lajong an hneh ṭum aṭangin player pahnih a thlak. Keeper Zothanmawia aiah Lalawmpuia a inlan a, midfielder Lalawmpuia Hnamte aiah forward William Lalnunfela a lut. AFC tana bul ṭantu zingah an club academy chhuak an awm lo.

A goal lo

Aizawl FC-in bul an ṭan ṭha zawk a, goal chance pawh an ngah. Ramhlun North hna hmasa chu goal venhim a ni a, Tawia naute an hnaah an chiang tlang hle.

Team ṭha zawk Aizawl FC tan H. Lalbiakthanga, William Lalnunfela leh Brandon VL Remdika ten chance ṭha an hlah a; captain Rohmingthanga, Ghanaian forward Mends, Albert Zohmingmawia leh Lalruatthara te'n goal khung theihna tur hun ṭha an bawhpelh vek bawk.

Ramhlun North forward Vanlalthla-muana'n injury time-ah Jerry F. Zonunsanga corner pet a tauh over a, hei hi MPL kaitharin goal hlauhawm neih a ni deuh mai. First half tawp danah AFC coach Mala aiin Ramhlun North coach Tawia a lawm zawk ang.

Second 10

Second half-ah Mends hmangin Aizawl FC-in chance ṭha nei hmasa mah se Ghanaian forward-in keeper Liansangpuia a pass bakah goal ban a pet per bawk.

Hemi hnu hian Ramhlun Norh winger Jerry F. Zonusnanga'n AFC chhuanvawr Chullova a paltlang hnuah keeper AwP-a'n a goal khung tur ropui takin a dan sak bawk.

Minute 72-naah substitute Ruatfela hmangin Ramhlun North-in goal an khung a, offside vangin pawm a ni lo. Minute li hnuah MPL kaithar tan Israel Laldingngheta'n freekick aṭangin ball ṭha bik a vawrh lut a, AFC keeper AwP-a'n a man sual zarah Ruatfela'n a pet goal a, Lawngtlai tlangval goal khungah sawisel tur a awm tawh lo.

Ramhlun North midfielder Zosangliana Sailo a talbuai duh lo a, best player-a thlan Chhaia hian a ball sem thiamna hmangin MPL kaithar game a tiṭha hle.

Aizawl FC an talbuai a, goal khung theihna an insiam thei lo. Injury time minute li pek belha second 10 chiah a awm tawh tihin Aizawl FC-in corner an hmu a, Rochharzela pet chu lehlam goal bula rawn tlan chhuak keeper AwP-a'n a tihsual thup nana a tauh phei hnuah Mends-a'n si phurh sutna goal a tauh lut.

Sudden Death

Hun pek belhah Ramhlun North-in Thlamuana hmanga an hun ṭha neih an khung thei lo a, Aizawl FC tan Ricky Lallawmawma, Lalremsanga leh Mends ten goal an khung thei bik lo. Penalty shootout hmangin chak zawk zawn a ngai ta.

Aizawl FC supporter awmna lamah penalty pet a ni a, champion laiin penalty an pet hmasa bawk. Mala naute zinga pet hmasa pasarihin an pet goal vek a, Ramhlun North tana pet hnuhnung ber Vanrammawia Ngente-in goal zawnah a pet lo a, MPL kaithar vanduaina chu Aizawl FC vanneihna a ni.

Mipui an pui

Ramhlun North FC ṭantute an ṭhahnem hle. Semifinal-a an thawm a rin tawh tehlul nen final-a an thawm a la ring zawk a, 'Hu Hu Hu' tia an au rual chu chak pui nan hmang thei se a duhawm hle.

Chutihrualin an chak loh hnu pawha ring taka Ramhlun North tia an la au rual ṭhap ṭhap chuan MFA Super emaw MPL emaw pawh ni se khelh an cho tawh tih a lang reng.

Final-ah chak zawk an awm ngai a, Aizawl FC pawh chak lo se vanduai zawka sawi theih an ni tho. I Day Football champion AFC-in ṭantu an nei ṭha a, khuang nena an thawm siam a rin ṭhat bakah awmze neia an au rual bawk avangin chak an phu lohna a awm chuang lo.

Coach thukhawchang

Ramhlun North FC coach Lalruatliana Sailo chuan, "First half kan khel ṭha tawk lo a, chak phu zawk an chak a ni," tiin Vanglaini palai a hrilh a; a hmelah erawh chak loh pawi a tih zia hmuh hmaih theih a ni lo.

Aizawl FC coach Mala chuan, "Kan vanneih vanga champion kan ni a, Pathian malsawmna liau liau a ni. Inchhuanna tur kan nei lo a, kan champion avangin ka lawm takzet a ni," tiin a sawi.

AFC hian an match hmasa bera Chanmari FC an hneh loh hnuah chak loh hmel an hmu tawh lo. Semifinal-ah Shillong Lajong lakah ṭum hnih si an phur a, a tawp dawnah an sût zo hram a, injury time-ah an chak. Final-ah chak lo zawk aṭangin hnehna an chang leh bawk. Aizawl FC chak duhna thinlung hi Mala aṭanga chhuak tih hmuh hmaih a thiang lo.

Inelna Thlirna Tawi

Champion Aizawl FC Rs.1,00,000/-

Runners Up Ramhlun North FC Rs 50,000/-

Fair Play Aizawl FC Rs 10,000/-

Best Player Zosangliana Sailo (Ramhlun North) Rs 3,000/-

Top Scorer Laldampuia (Chanmari West) Rs 3,000/-

Champion Kalkawng

GROUP A

Aizawl FC 1-2 Chanmari FC

AFC : Lalramchullova 86'

CFC : Malsawmfela 25'; Lalruatfela Zote 36'

AIFF Under 19 0-2 Aizawl FC

AFC : Bright Middleton Mends 38'; Ricky Lallawmawma 45+1'

Aizawl FC 3-2 Chhinga Veng FC

AFC : Rochharzela 55'; Lalremsanga 90'; Brandon VL Remdika 90+4'

CVFC : Khawpuimawia 19';

MS Dawngliana 90+2' (P)

Chanmari West 1-2 Aizawl FC

CWFC :Laldampuia 82'

AFC : Lalmuansanga (OG) 29'; Lalramchullova 60' (P);

SEMIFINAL

Shillong Lajong 2-3 Aizawl FC (a.e.t)

SLFC : Lalramchullova 32' (OG);

Joe Zoherliana 50'

AFC : Bright Middleton Mends 43';

Albert Zohmingmawia 86', 104'

Final

Ramhlun North 1 - 1 Aizawl FC

Penaltyshootout-ah Aizawl FC 7-6 in an chak

RNFC : Lalruatfela 76'

AFC : Bright Middleton Mends 90+5'

Penalty pet dan

Aizawl FC Ramhlun North

Lalramchullova G C. Ramdinmawia G

Bright Middleton Mends G Zosangliana Sailo G

B. Zoramthara G Lalruatkima Dosel G

H. Lalbiakthanga G Lalhmangaiha G

Lalrinzuala G Vanlalthlamuana G

Lalremsanga G Jerry F. Zonunsanga G

Lalruatthara G Vanrammawia Ngente X

Note : G = Goal; X - Goal lo