Arsenal ngam loh Liverpool

Emirates Stadium-ah Gun-ners-in vawi thum lai laipui kap puak mah se an tlar hnung ten Liver-pool tlar hma an dawl zo lo a, an khelmualah 4-3 in Arsenal an tlawm.

Arsenal hian Theo Walcott hmanga goal hmahruai an khung zet hnuah Liverpool-in Philippe Coutinho goal hnih, Adam Lallana leh Sadio Mane-te goal hmangin an chhanglet a, Gunners-in Alex Oxlade-Chamberlain leh Calum Chambers goal hmangin inlehthalna ropui lantir tum mah se goal an chhuah hnem hret avangin hunin a daih lo.

Tun season Premier League match hmasa zinga hmuhnawm ber ang hiala chhal ngamah hian football ti hmuhnawmtu chu a kim vek - penalty pet goal loh, free kick ropui, mimal goal ropui, team goal leh borak sang tak hnuaia team pahnih innawr hmuh tur a awm a, football ngainatute mit a tlai.

Coutinho i mawi chuang e!

Team pahnih an inngam tawn a, hun ṭha nei hmasa zawk erawh Arsenal an ni. Liverpool full-back Alberto Moreno-a'n penalty area-ah ṭul lo takin Walcott a kalh thlu a, Arsenal-in penalty an hlawh. Penalty pet goal ngei tumin Walcott pen chhuak mah se Liverpool keeper Simon Mignolet-a'n ngaihdan dang a nei a, English forward pet hi ṭha takin a dang.

Mahse, Walcott a che chhe rei lo. Minute 31-naah a tihsual thup nan Arsenal hmahruaina goal a khung a, Emirates stadium-a nghing! Team pahnih an innawr tawn zak zak hnuah Liverpool-in free kick an hlawh chhuak a, a pet turin Philippe Coutinho a pen chhuak. Brazilian forward hian player thiam bik a nihzia pholangin Petr Cech-a ban phak lohin a kil sirah a pet lut a, goal ropui bik niin first half a tawp zui.

Goal a sur!

Second half ṭan a ni a, minute li a liam hman chauh tihin Liverpool-in an goal hnihna an khung - Adam Lallana chuan Arsenal penalty area-ah ṭha takin a awma ball la thlain a khung a, Arsenal tlar hnungin tih theih an nei lo. Reds an hmuhnawm tulh tulh a, vawi 19 zet ball an in pass kual hnuah Coutinho-a'n an goal thumna a khung.

Pound maktaduai 34 man Sadio Mane-a'n a club thar hnenah an inseng thlawn lo tih hrilh nan mimal goal ropui a khung chhunzawm a, Senegalese forward hian Gunners tlar hnung a chhaih phar hneh hle!

Goal li an khung hnuah Liver-pool an inthlahdah a, substitute Alex Oxlade-Chamberlain chuan Arsenal tan a mimal thawhrah sengin goal dang a khung ve leh. Granit Xhaka luh hnuah Arsenal khelh danin awmzia a nei a, Calum Chambers hmangin minute 75-naah an goal thumna an khung a, Arsenal an phur thar. Liverpool player-ten goal dang khung leh tum aiin a venhim lam an ngaipawimawh a, Reds-in 4-3 in hnehna an chang ta a ni.

Eng nge an sawi?

Arsenal boss Arsene Wenger chuan, "Tlar hnung lamah tawnhriat kan la ngah tawk lohna a lang a, Liverpool khan an khel ṭhat takzet avangin minute 15 chhung vel kha chu mak ti taka en mai loh chu tih theih a tam lo. Euro khel zo hlim Aaron Ramsey kan chhawr a ngai a, kan la chau deuh a ni," tiin an la inpeih tawk loh thu a sawi.

Liverpool manager Jurgen Klopp chuan, "Kan goal lina kan khung khan minute 30 vel khelh tur kan la nei chungin kan lawm mah mah a, game a la tawp lo tih kha kan hre lo a ni. Arsenal kha chak lo mai tur dinhmunah an ding tih chu thil chiang tak a ni a, mah se an beih let theihna turin hun
ṭha kan siamsak a ni. Hamrik tawp ber ham a nih hma chuan engmah a chiang lo a, minute 90 pumpui thlir erawh chuan chak kan phu zawk. Goal tam tak kan khung zel ang a, chutihrual chuan kan tlar hnung pawhin kha aia ṭha khan an ti thei. Kan league khelhna hi Premier League a ni a, he hmunah hian eng thil mah awlsam a awm lo," tiin a nauten insiamṭhat an mamawh thu a sawi.