Saina Nehwal a tla

Rio Olympic neih meka India-in medal dawn a beiseina langsar pakhat Saina Nehwal chu Maria Ulitina hneh loin a tla. London Olympic bronze medallist Saina hi minute 39 chhungin Ukraine nula lakah hian 18-21, 19-21 in a chak lo. Hetihlai hian P.V. Sindhu leh Kidambi Srikanth te chuan last 16 an lut thung.

World number 1 hlui Saina hian Group G match hmasa berah a thlengtu Brazil nula Vicente Lohaynny chu lo hneh tawh mah se Ulitina lakah a che fuh hleithei lo, a forehand a nat tawk loh bakah a backhand a ti sual fo a, nidang angin a che rang tawk lo bawk.

Kum 26-a upa Saina chuan, "Ka khupah na ka nei a, chu chuan chet vel a ti harsain ka khelh ṭhat ber ṭum a ni lo. Ka chak loh avangin ka rilru a na a, hrehawm ka ti takzet," tiin tranining naa hliam a neih chu a chak loh chhan pakhatah a ngai.

Hyderabad nula hian London-ah khan Indian Badminton chanchina a vawi khat nan Olympic medal a lo la tawh a, ani hi badminton inelna bika India tan infiamna khawmpui liana medal dawng thei hmasa ber leh awmchhun a la ni rih.

Hmeichhe singles inkhel dangah World Championship silver vawi hnih dawng tawhtu Sindhu chuan Canadian Michelle Li chu 21-15, 21-17 in a hneh. Mipa singles lamah India tlangval neih chhun Srikanth chuan Sweden aiawhtu Henri Hurskainen lakah 21-6, 21-18 a hnehna changin last 16 a lut bawk.