Dortmund tan Bellingham-a'n a pet goal

Bundesliga ṭan hmain DFB Pokal khelh hmasak a ni a, Borussia Dortmund chuan Thawhṭanni zan khan Duisberg 5-0 in an sawp. Dortmund tan hian player thar Jude Bellingham-a'n a match hmasa berah goal a khung nghal a; Jadon Sancho, Thorgan Hazard, Gio Reyna leh Marco Reus ten goal khat ṭheuh an khung.

MSV-Arena-ah mikhual Dortmund-in bul an ṭan ṭha a, minute 14-na lekah handball vanga an penalty hlawhchhuah chu Manchester United nena sawi zawm Jadon Sancho-a'n goal-ah a chantir. Inkhelh bana sawi zui hlawh ta ber erawh Jude Bellingham a ni.

Kum 17 mi Bellingham hian bul a ṭan a, Reyna leh Hazard te thawhrah sengin minute 30-naah goal a khung. English rawlthar hian Dortmund tana goal khung naupang ber record a siam. German club hian tun nipuiah khan pound maktaduai 25 (la pung leh thei tur) in Bellingham hi an lalut a, Birmingham City chuan a jersey number hak ṭhin 22 chu tumah hak leh tawh lo turin an dah ṭha. 

Manchester United leh club lian dang nen pawha an sawi zawm Bellingham hian Dortmund a zawm hma pawhin boruak a nei lian a, goal a khung nghal bawk avangin a chanchinin sawi zui a hlawh hle.

Dortmund tan hian Erling Braut Haaland pawhin bul ṭanin minute 38-naah Norwegian striker titlutu Dominic Volkmer hnawhchhuah a ni. Haaland-a freekick hlawhchhuah hi Hazard-a'n mawi zetin minute 39-naah a pet goal.

Minute 50-naah Dortmund-in goal lina an khung a, hei erawh vannei a tel. Hazard-a freekick petin Reyna a per hnuah a goal. Minute 57-naah captain Reus a rawn lut a, inhliam vanga season tawp lama inlan lo German forward hian second 30 pawh tling loah a pet goal nghal. Dortmund-in 5-0 in hnehna an chang a, DFB Pokal first round a ni tih erawh hriat a ṭha.