Neymar lamah PSG an ṭang

Paris St-Germain-in Pathianni zan khan an mualah Marseille 1-0 in an hneh lo a, hemi ṭum hian  player panga hnawhchhuah niin Neymar pawh a tel. Parc des Princes-ah hian Brazilian forward chuan vun rawng hmuhsitna ṭawngkam an hman thu a sawi a, PSG chuan Thawhṭanni khan an player lamah an ṭan tlat thu an puang.

PSG leh Marseille inkhelh ṭum hian card vawi 17 zet phawrh niin player panga an hnawt chhuak. French champion aṭangin Leandro Paredes leh Layvin Kurzawa bakah Marseille duo Jordan Amavi leh Dario Benedetto te an hnawt chhuak a, referee-in TV replay a en let hnuah hnung lam aṭanga Alvaro khawihtu Neymar chu red card a pe leh bawk.

Brazilian forward hian a chhuah pahin fourth official bulah 'chi leh chi inthliar a awm vang' tiin an sawi. Twitter-ah Neymar hian, "Ka inchhirna awmchhun chu a hmaia ka hnek lo kha a ni," tiin a ziak a, a chunga ṭawngkam bawlhthlawh hmangtua a puh Alvaro lakah ṭawngkam a duh tui lo. PSG chuan, "Ligue de Football Professionnel (LFP) disciplinary commission-in an chhui chian thuai kan beisei a, pui turin kan inpeih," tiin thuchhuah an siam.

Marseille pawh an player Alvaro lamah an ṭang a, Olympians (Marseille kohna) chuan, "Alvaro Gonzalez hi mihang deusawh chi a ni lo tih club a zawmtirh aṭanga a nungchang aṭangin kan hre thei a, a teammate-te pawhin an hria. Marseille hi French professional sport-ah chuan chi leh chi dona kawnga hma la nasa kan ni," tiin thuchhuah an siam ve thung.

Olympians hian an player Alvaro vautute chungah hremna lekkawh theih a nih thu an tarlang tel bawk. Brazilian media chuan Alvaro Gonzalez mimal telephone number an tar chhuak a, hemi a nih avang hian Marseille player hian hmun hrang hrang aṭangin thah thlenga vautu a nei a ni.

Gonzalez chuan chi leh chi inthliarnaa a fihlim thu a sawi a, Neymar chu chak lo thiam loah a puh bawk. LFP disciplinary committee chu vawiin hian an inhmu khawm dawn a, red card hmutu player pangate chu an chungchang a mal malin an enfiah ang a, hremna lekkawh dan tur an rel ang.