Thomas & Uber Cup an sawn

Badminton World Federation (BWF) chuan Thomas and Uber Cup chu kuminah khelh a ni dawn lo tih an puang a, ram leh ram badminton team hmanga inelna hi nakkumah neih a ni ang.

Ruahman lawk dan chuan October 3-11 chhung hian Denmark-ah khelh tura tih a ni. Mahse Covid-19 vangin ram tam zawk an la inkharkhip a, player tan ram danga zin chhuah a la harsa rih hle a ni.

Hripui leng avang hian ram hrang hrang - Korea, Thailand, Indonesia, Australia, Taiwan, Singapore leh Hong Kong te chu an lo inhnukdawk hman tawh a, nakkuma sawn a nih takah chuan an thutlukna pawh an ngaihtuah ṭha mai thei.

Thuchhuah siamin BWF chuan, "BWF leh Badminton Denmark te chuan tournament chungchang hi ngun takin a ngaihtuah a, player leh inelna kaihhnawih tur zawng zawngte kan him tlan zawk nan nakkum atan sawi mai ni se kan ti," tiin an sawi.

Thomas and Uber Cup-ah hian India pawh inlan tur zingah a tel. Mipa inelna huangah China chu champion lai an ni a, hmeichhe huangah Japan chu nomawi kawl mektu an ni thung.