Striker ka duh  - Pirlo

Juventus manager Andrea Pirlo chuan a naute chuan goal khung thei viau mah se striker a mamawh thu a sawi a, nipui bazar chhungin Turin khawpuiah tu ber nge a seng luh dawn tih erawh hriat a la ni lo.

Pirlo hian Maurizio Sarri hmun ruak luahin team enkawl hna a thawk ṭan a, Juve striker neih sa Gonzalo Higuain chu a ruahmannaah a tel ve loh thu a hrilh. Argentine striker hian Turin khawpui a chhuahsan dawn chiang tawh a, Major League Soccer lamah a kal ang.

Italian manager Pirlo chuan, "Bazar hun hi October 5-ah a tawp dawn, chumi hma chuan a rang thei ang berin striker lakluh ka duh," tiin a sawi. Serie A champion hian Barcelona ṭangin Luis Suarez an lalut dawn niin a lang a, contract la ziak chiah lo mah se inremna erawh an nei tawha ngaih a ni.

Juve hian season thar inbuatsaih nan Serie C team Novara chu friendly match an khelhpui a, forward Cristiano Ronaldo hoa inlan team hian 5-0 in hnehna an chang.