London derby - Conte Chelsea Chak

Hun tawp hma hreta Diego Costa goal hmangin Chelsea-in an mikhual West Ham 2-1 in an hneh a, Premier League match hmasa berah Antonio Conte-a'n hnehna a chang nghal.

Thawhṭanni zan inkhelah Michail Antonio laka Cesar Azpilicueta penalty hlawh-chhuah chu Blues winger Eden Hazard-a'n minute 47-naah goal-ah a chantir a, West Ham-in James Collins hmangin minute 77-naah sut mah se Diego Costa-a'n minute 89-naah box pawn aṭangin chakna goal a khung.

Premier League ṭan hmaa manager hming langsar Pep Guardiola leh Jose Mourinho te hnungzuiin Italian manager Conte-a'n a match hmasa berah point thum a hlawh chhuak.

Conte thuneihna

Chelsea-in champion lai nichungin season liam ta khan mualpho takin inkhel bul an ṭan a, December thla a thlen meuh chuan Portuguese manager Mourinho-a'n a hna a chan a, season tawpah 10-na an ni pha ṭawk bawk.

Conte hnuaia hnehna chang nghal tur hian Italian manager-in thlak danglam a nei nghal. Chelsea midfield innghahna Cesc Fabregas chu bench-ah
ṭhuttir a ni a, season hnih chhung match 50 tling thuak khel ve ve Spanish midfielder hi bench-ah a ṭhu tluan. Pound maktaduai 30 man midfielder N'Golo Kante chuan inkhel bul ṭanin 4-1-4-1 formation-ah Leicester City midfielder hlui hian defence hmaah hmun pawi-mawh a chang. Italian coach-in hming langsar a dah pawimawh hmasa lo a, thulukna huaisen a siam nghal.

Midfield-ah Nemanja Matic leh Oscar te inkawpin Belgian striker Michy Batshuayi chu bench-ah awmin Spain international striker Costa chu a mal tlat. Tlar hnungah Branislav Ivanovic, John Terry, Gary Cahill leh Cesar Azpilicueta te inremin a naupang ber Spanish wing back hi kum 26-a upa niin a bak zawng hi kum 30 chunglam an ni tawh a, European competition khel lo mah se defender an melh ve reng a ngai ang.

Bilic lam ve thung

West Ham-in Europa League an khel dawn a, season liam taa team hmuhnawm ber zinga mi an ni. Hammers hian nipui transfer-ah player pariat an lalut a, chung zinga pathum Arthur Masuaku, Havard Nordveit leh Andre Ayew te'n inkhel bul an ṭan. Swansea aṭanga lakluh pound maktaduai 20 man Ayew-a'n a club thar tan bul a
ṭan fuh lo a, first half-ah malpui na vangin lakchhuah a ni.

Arsenal manager Arsene Wenger ang lo takin Antonio Conte leh Slaven Bilic te'n Euro 2016-a player-te an chhawr ngam a, team tan an ṭangkai bawk. Blues tan Belgium captain Hazard a pawimawh a, minute 67-naa lut Payet chu Hammers goal khung theihna atana corner pettu a ni.

An intluk tawk

Minute 90 chhungin Chelsea an chak a, inkhelah erawh an chungnung tam lo. Blues midfielder Kante-a'n second 44-na lekah Andy Carroll chhuhsak nghalin a thiamna a lantir nghal a, hemi hnu lawk hian French midfielder hian English forward lakah hian yellow card chawi mah se a talbuai zui lo. Euro 2016-a France tana khelpha Kante hi a match hmasa berah a man phu tawkin a khel a, Blues hi Hammers laka an chungnung bik loh avangin Foxes midfielder hlui hi a ṭang-kai lehzual.

Sawi zui hlawh chu minute 67-naa West Ham keeper Adrian laka Costa foul a ni. Chelsea forward hian first half-ah yellow card a hmu tawh a, box chhungah Hammers keeper hi a tlawh tluk leh avangin hnawhchhuah theih a ni. Chakna goal khung zuitu Costa a vannei a, yellow card vawi hnihna pek a ni lo hlauh. Inkhelh banah manager pahnihin Costa chet dan chu awm lo an tih loh thu an sawi thung a, referee thutlukna chu a dikah an ngai ve ve bawk.

Bilic-a'n pawi a ti

West Ham boss Slaven Bilic chuan, "Hun tawp dawna goal chhuah vanga chak loh chu a pawi a ni. Kan inhnehtawk hnuah kan khelṭha a, field laia kan tihsual vangin goal kan chhuah a, kan goal chhuah dan a ho lam hret a ni. Chutihrualin Chelsea kha team ṭha zawk an ni a, mimal ang pawhin Eden Hazard, Diego Costa leh Willian te kha player ṭha bik an ni," tiin inkhel chungchang a sawi.

Hammers hian Ningani zan hian Europa League qualifier first leg-ah Romanian club Astra Giurgiu chu khualmualah an hmachhawn ang a, Pathianni zana Manchester United laka chak lo AFC Bournemouth an mikhual ang.

Lawm hlawh Conte

Antonio Conte chu khelmual pawnah a awm mai mai lo a, Costa-a'n goal a khung chiah phei chuan player aiin a lawm nasa emaw tih mai tur a ni. Italian manager hian Chelsea ṭantute nen an chakna goal hi a lawm a, Blues supporter-te lakah a tla na nghal hle.

Kum 47-a upa Conte chuan, "Premier League hi TV kal-tlang chauhin ka lo hre ṭhin a, Champions League leh Europa League-ah English club ka hmachhawn tawh bawk. Amaherawhchu han khelh chiah hian league harsat zia chu a chiang a ni. League boruak a sang a, tharum hman nasat a
ṭul bawk. Thil thlen dan zawng zawng ngaihtuah khan zaninah pawh hian ka mu thei ang em tih ka hre lo," tiin rilru zawng zawnga inelna a hmachhawn thu a sawi chhuak.