India beiseina Srikanth leh Sindhu

Rio Olympic-ah India infiammiten beisei angin medal an hlawh chhuak thei rih lo. Badminton mipa leh hmeichhe singles lamah beiseina an neih an la chhawn nung ve zel thung. Thawhṭanni zan khan Srikanth Kidambi leh Pusarla Venkata Sindhu te chuan an khingpui hnehin quarterfinal an lut.

Riocentro Pavilion-a mipa last 16 inkhelah India tlangval Srikanth-a'n beisei phak baka khel ṭhain Denmark aiawhtu world number 5 Jan O Jorgensen chu minute 42 chhungin 21-19, 21-19 in a hneh.

Kum 23-a upa Sri-kanth hian semifinal lut tur chuan vawiin tlai dar 5:00 hian world champion vawi nga lo ni tawh Lin Dan a paltlang a ngai dawn a ni. China tlangval Lin Dan hi Olympic hnuhnung pahnih Beijing leh London-a cham-pion kha niin kuminah pawh hian champion tura rinkai ber a ni.

Srikanth chuan, "Olym-pic quarterfinal-a Lin Dan ka hmachhawn thei tur hi ka lawm. Kan chak lohna leh chet fuh lohna te sawi hun a ni tawh rih lo a, tuna pawimawh ber chu kan inkhelh hmabak a ni. Hnehna chan theih ngei ka inbeisei," tiin world number 1 hlui lakah tlawm mai a tum bik lo.

Hmeichhe sing-les lamah World Cham-pionship bronze-medal-list vawi hnih ni tawh Sindhu pawhin Chinese Taipei nula Tai Tzu Ying lakah minute 40 chhungin 21-13, 21-15 in hnehna a chang. Hyderabad nula hian Thailand star Ratchanok Intanon hneh-tu Japan chhunavawr Akane Yamaguchi a hma-chhawn leh ang.

Kum 21-a upa Sindhu hian Rio Olympic-ah hian a khel ṭha tluang rih hle a, last 16-a Tzu Ying nen an inhmachhawn ṭum pawh hian attacking a neih ṭhat bakah amah a inveng ṭha hle a, a chesual meuh lo a a ni.