Prince Poldi-a'n Germany kawr a hlip

Germany striker Lukas Podolski chuan in-ter-national football a chawlhsan thu a sawi chhuak. Arsenal striker hlui hi Germany jersey ha chunga khelmuala a inkhel lai kan hmu tawh dawn lo tihna a ni.

Kum 31-a upa Podolski hian Germany tan match 129 khelin Lothar Matthaus (150) leh Miroslav Klose (137) te chiah ani aia inlan hnem an awm a, goal 48 khungin Miroslav Klose (71) leh Gerd Muller (68) te chiah tluk loh a nei.

'Prince Poldi' tia hming lem an vuah sak chuan, "Ka thil thlir dan a dang tawh a, ka hun a tawp tawh. German Football Association nena hun nuam leh hrehawm kan hman zawng zawngte kha engti kawng zawng maha theihnghilh theih leh thlak thleng theih a ni tawh lo ang," a ti.

Podolski chuan sawi chhun-zawmin, "Kum hnuih chauha upa ka nih laiin Germany-ah kan pem a, kha tih hunlai khan ball pet dan pawh ka la thiam lo - world champion hial ka ni thei kha ka duhthusam leh beisei phak bak aia sang a ni," tiin a sawi. Germany coach Joachim Low chuan Poldi chu player rintlak a nih thu a sawi bakah a hnathawh tawhte chu ropui a tih thu a tel bawk.

Poland rama piang Podolski hi Euro 2004-ah khan a tirah thlan ni lo mah se koh leh hnuhnawh a ni a, ram tana a goal hmasa ber chu kum 2005 khan Thailand lakah khungin 2005 FIFA Confederations Cup-ah khan match li a khelh
aṭangin goal thum a khung a - hemi hnu hian a dam phawt chuan ram tana khel tura koh a ni ṭhin.

2006 FIFA World Cup-ah khan khatih hunlai a Germany rawlthar duhawm khan ram tan goal thum khungin Lionel Messi leh Cristiano Ronaldo te khumin 'Best Young Player' a tan thlan a ni. Theihna sang tak a neih vang leh club ai maha ram tan a khel ṭhat ṭhin zawk avangin kum 27 leh ni 13 chauha upa ni chungin ram tan match 100 a khel tling der! Germany tana match 100 khel tling thei naupang ber a ni.

Bayern Munich tan match 71 a khelh
aṭanga goal 15 khung thei striker hian ram tan European Championship vawi li a khelh bakah FIFA World Cup ṭum thum a khel bawk a - 2014 Brazil World Cup champion team-ah khan a tel nghe nghe. Euro 2016-ah khan koh ni mah se vawi khat chiah inlanin Slovakia 3-0 a an hneh ṭuma bench aṭanga a tlan luh kha ram tana a inlana hnuhnung ber a lo ni ta.