Spanish Super Cup Barcelona tan nomawi a hnai
Zanin dar 2:30-ah Barcelona chuan Spanish Super Cup second leg khel turin Sevilla an mikhual dawn a, khualmualah 2-0 a hnehna an lo chan tawh avangin nomawi chawi turin Catalan club dinhmun a ṭha hle.
Sevilla-in UEFA Super Cup-ah Real Madrid hneh zo loin nomawi an hloh tawh a, season tira an nomawi chawi theihna pahniha a zawna hlawhtlin loh chu an duh dawn lo - zaninah an theihna zawng zawng nen an inkhel ang.
Neymar tel loin
Olympic football-a Brazil tana inlan Neymar chuan nizan khan ram tan semifinal a khel a, Barcelona squad-ah a la awm lo. Hetichung hian Lionel Messi leh Luis Suarez an la awm cheu avangin Barcelona hi team ṭha tak an ni.
First leg-ah Luis Suarez-a'n goal a khung a, Barcelona goal hnihna khungtu Munir El Haddadi hi a naupan anga enliam chi a ni lo bawk. Kum 20 leka upa Spanish winger hian pre-season duhawm tak a hmang tawh a, season hmasa khan Catalan club tan match 26 inlanin goal riat a khung ve bawk.
Player thar
Barcelona manager Luis En-ri-que-a'n nipui bazarah player thar pali a lalut a, Valen-cia mid-fielder Andre Gomes, Paris Saint-Germain defender Lucas Digne, Lyon defender Samuel Umtiti leh Villarreal aṭanga Denis Suarez lak let nan pound maktaduai 90 bawr vel a seng tawh a, a squad neih sa ngaihtuah phei chuan team ṭha tak an nihzia hi inhrilh nawn fo a ngai lo.
Sevilla nen an inkhelh hma-sak ṭumin player thar zingah Samuel Umtiti leh pound maktaduai 47 chuang man midfielder Andre Gomes te an la inlan lo a, zaninah a inlan tir tawh a nih pawhin a mak lo ang. Andre Gomes hi Euro 2016 champion Portugal team ami kha a ni a, Barcelona kawr ha chunga a chetla vel hi Catalan club fan-ten an hmu chak tawh hlein a rinawm.
Iniesta a inhliam
Super Cup first leg-ah hliam vangin Barcelona player pahnih Andres Iniesta leh Jeremy Mathieu te lakchhuah an ni a, player pahnih hian zaninah Sevilla an hmachhawn thei dawn lo.
Barcelona chuan thuchhuah siamin, "Thawhṭanni khan kan player pahnih te hliam hi uluk taka en niin Iniesta hian a khupah hliam a tuar a, kar hnih tal enkawl a ngai ang. Mathieu hian a mal dinglamah hliam a tuar thung a, ani hi kar thum tal enkawl a ngai thung dawn a ni," tiin an sawi.
Catalan club thuchhuaha a lan dan chuan Iniesta leh Mathieu hi Barcelona-in Inrinni zana tun season-a an La Liga match hmasa ber Real Betis nen an khelh hunah pawh an inlan thei dawn lo tihna a ni.
Sevilla ve thung
Season thum chhung Europa League champion ni thei Sevilla-in PSG lakah an coach Unai Emery an chan a, a thlaktu Jorge Sampaoli enkawlna hnuaia competitive match an khelh tawh pahnihah la chak zo lo ve ve mah se an hmachhawn team hi Real Madrid leh Barcelona an ni tih hriat sak a ṭul.
Copa America-a Chile champion pui theitu coach enkawlna hnuaiah attacking football hmuhnawm an khel a, nipui bazar-a a player lakluh zingah Japanese attacking midfielder Hiroshi Kiyotake, Brazil international Ganso leh French striker Wissam Ben Yed-der te hi buaipui tham khawpa khel thei vek an ni.
Ben Yedder hian season hma-sa khan French club Tou-louse tan inelna hrang hrangah match 41 inlanin goal 23 a khung a, Ligue 1-a striker hlauhawm pawl a ni. Ganso hi Neymar nena lar rual an ni a, Europe-a a theihna pholangin turin Sevilla a zawm - goal thun chakin a tuihal ang.