Klopp-a hote hmachhawn turin Chelsea an inpeih em?

Premier League champion thar Liverpool hi Jurgen Klopp-a kaihhruaina hnuaiah season thum chhung vel chu team ṭha ber zinga mi an ni tawh. Liverpool el phak turin Chelsea hi an ṭha tawk em tih chu hunin a hril ang. 

Hetihlai hian Frank Lampard-a'n dawih zawk nih a tum lo a, kumin July thla khan  Lampard leh Reds coaching staff-te a langa mawi chin pelin an inchhang tawh.

Season ṭan tirhah Klopp-a'n Chelsea player lak dan chu uchuak hret nia a ngaih thu a lo sawi zeuh tawh a, Lampard-a'n nomawi chawi tumin Liverpool tih hnu an tih ve mai thuin a chhang let. 

Tun kar tawpah team pahnihte hi an inhmachhawn nghal dawn a, player thar awm khawm Chelsea hi Reds hmachhawn turin an inpeih em, tih hi a hriat châkawm lai chu a ni.

Kum 24 mi Timo Werner-a'n match hmasa berah harsatna a tawk lo a, a tlan chak vanga lar German forward khelh dan hi Premier League nen pawh a inmil nghal viau. Amaherawhchu

penalty a hlawh chhuahna turah keeper-in a malpuiah a do fuh a, Reds nena inkhelh hun atan a dinhmun a chiang lo. 

Kum 21 mi Havertz erawhin hun a la mamawh dawn niin a lang a, Werner aia Chelsea a zawm hnuhnun zawk vang a ni thei bawk. Lampard erawh German duo khelh danah a lawm a, Havertz-a'n tih ṭhat langsar nei lo mah se a thawhrimna leh thiamna a hmuh hmaih lo.

Chelsea player thar dang Hakim Ziyech-a'n Liverpool a la hmachhawn theih hmel loh a, chutih rualin Reds hmachhawn tur hian Christian Pulisic a inpeih hman hmel a, Mateo Kovacic-a'n hremna a hman zawh dawn bawk avangin attacking lam chu an inpeihah a ngaih theih. Chutih rualin tlarhnung erawh an ngaihtuah awm hle.

Chelsea aṭanga inzir chhuak Tariq Lamptey-a'n left back Marcos Alonso a chhaih buai hneh a, Trent Alexander-Arnold hmachawn tur chuan Ben Chilwell a dam hman a ṭul. Leicester aṭanga an lakluh Chilwell hi a dam hman hmel a, mahse match fitness a nei dawn lo.

Brazilian defender tawnhriat nei ṭha Thiago Silva dinhmun a la chiang lo a, hattrick siam hlim Mohamed Salah leh Sadio Mane-te lakah chuan an la buai fu thei.

Buaina belhchhah turin keeper manto Kepa Arrizabalaga-a'n ho takin goal a chhuah a, Rennes aṭangin pound maktaduai 20 man keeper Edouard Mendy an lalut hman a nih pawhin bul ṭan tur em chuan a inpeih hman a rinawm loh. Spanish keeper Kepa hian season hmasa tawp lamah kum 38 mi Willy Caballero tluk loh chang a nei a, London club-ah a cham rei ang em tih chu zawhna a ni ta.

Frank Lampard chuan, "Hma kan sawn zel dawn. Kan match hmasa ber chauh a ni a, ni li chauh a huhoa training-na hun kan nei. Kan zinga mi thar pahnihin bul an ṭan a, lawmna tur tam tak a awm. Ka beisei ram kan la thleng lo a, kan duhthusama khel turin hun a duh ang. Chutih rualin league match hmasa bera chak hlutzia kan hria a, kan result-ah kan lawm hle," tiin hun an la mamawh tur thu a sawi.