Burnley player manto ber Defour

Premier League kaithar Burnley chuan, an club player manto ber ni turin Belgium mid-fielder Steven Defour chu Ander-lecht aṭangin an lalut. A man zat hi chiang takin puang zar lo mah se an club chanchina player manto ber a nih thu erawh an puang thung.

Khawthlang media-te chuan kum 28-a upa midfielder manah hian Burnley hian pound maktaduai 7.35 vel an seng niin an tarlang a, Turf Moor-ah hian kum thum chhung cham turin contract a ziak a ni.

Belgium tana vawi 46 inlan tawh midfielder hi kum 2007 khan Standard Liege tan a khelh laiin Belgian Golden Shoe (Belgian First Division best player) chawimawina a lo dawng tawh a, World Cup 2014-ah inlanin Euro 2016 khelh zawh takah erawh ram tana koh zingah a tel lo.

Standard Liege tan a khelh laia Belgian league nomawi vawi hnih lo chawi tawh midfielder chuan, "Burnley tan ka tawnhriatte ka chhawr ṭangkai theih ngei ka beisei a, Premier League-a kan cham chhunzawm zel ka beisei. Ka tan chuan chona thar a ni a, mah se chona thar hmachhawn hi ka duh chu a ni," a ti.

Porto tan season thum a khelh chhunga league nomawi vawi hnih lo chawi tawh midfielder hi kum 2011 khan Everton chuan Standard Liege tana a khelh laiin pound maktaduai 9-in an lo dawr tawh a, Sir Alex Ferguson khan Manchester United-a lakluh tumin a lo dawr tawh bawk. Mahse, Red Devils-in an rim lai hian a ke phahah hliam a tuar a, Old Trafford a pan ta lo.