DSK tan Juan Quero a rinawm

Real Madrid Academy chhuak midfielder Juan Quero Barraso chuan season hmasaa a zawm DSK Shivajians tana khelh chhunzawm zel turin contract thar a ziak. Spanish midfielder hian season hmasa khan DSK tan match 10 inlanin goal thum a khung sak a, a ṭhiante thun tur vawi thum siam sakin I League-a player hmuhnawm ber pawl a ni.

Rayo Vallecano tan pawha lo khel tawh Quero chuan, "DSK Shivajians tana ka khelh chhunzawm zel thei tur hi ka lawm a, manager thar Dave Rogers hnuaia khelh a nuamin player-te hnena inrintawkna tuh sak a thiam em em a ni," tiin an coach thar chu a fak nghal.

Kum 31-a upa midfielder hian Spanish club zingah Numancia tan 2008-09 season khan La Liga a lo khel tawh a, Spanish Segunda Division lamah a hun tam zawk hmangin Las Palmas, Cordoba leh Hercules tan a lo khel tawh bawk.