Sharapova a lo kir hnai - RTF president

Russian Tennis Fede-ration (RTF) president Shamil Tarpishchev chuan International Tennis Federation-in tennis khel thei lo tura a hrem mek Maria Sharapova chu nakkum January thlaah a inkhelh theih tawh mai theih thu a sawi chhuak.

Thawhṭanni khan thu-thar thehdarhtute hmaah Tarpishchev chuan, "Sep-tem-ber thla hian thil eng-kim a chiang dawn a, kum hnih hrem tur ni mah se a dinhmuh ngaihtuahin a hriat loh vanga tisual palh a nih avangin January-ah chuan a inkhelh theih tawh ka beisei," a ti.

Kumin Janury thlaa Australian Open khelhah khan Grand Slam vawi nga champion tawh Sharapova hian infiammite tana kumin aṭanga hman phal loh meldonium a hmang tih hmuh chhuah a ni a - June hla khan ITF chuan kum hnih chhung atan an hrem.

Kum 29-a upa Sharapova hian hrem a nihna hi infiamna lama thubuai ngaihtuahtu sang ber Court of Arbitration for Sport (CAS) hnenah July thla khan a khing let a - September 19 hian a thubuai hi ngaihtuah sak a ni ang.

Tennis star Sharapova chauh ni loin Russia sorkar hi infiamna khawvelah World Anti-Doping Agen-cy (WADA) chuan a zirchianna aṭangin a thianghlim lo hleah a puh a, he vang hian Rio Olympic-ah pawh an tel lo teuh hle.

Mahse, International Olympic Commitee (IOC) chuan dan zawm famkimte tan kawng a hawn sak a, hei vang hian Russia tennis hotupa Tarpishchev pawh hian an star player lakah beiseina a nei sang niin a ngaih theih.