Sawi loin Lammualah an chingfel ang Chhinga Veng Vs Mizoram Police
Vawiin tlai dar 2:30 hian MPL-a tling thar Chhinga Veng FC-in Mizoram inelna sang bera khel phak lo Mizoram Police an hmachhawn dawn a; MFA Super Cup last 16 inkhel tur pariat zinga ngaihven hlawh ber chu kan nghak chhuak ta.
November 27, 2015 Zan
Mizoram Police-in MPL4 match hnuhnung berah Be-thle-hem Vengthlang FC an hmachhawn a, point thum an hlawh chhuak a nih chuan a chhe berah MPL Relegation Playoff an khel ang.
Police-in an zia an chhuah a, 'thi leh thau' pawlha ṭangin team ṭha zawka ngaih BVT lakah chak phu khawpin khel
ṭha mah se, football nunrawn zia bak hmuh a ni lo.
November 27 zanah goal a luh loh avangin Mizoram Police an tla. Khami ṭuma 'mittui' tla kha hruk hul theih ni lo mah se, vawiin tlaia Chhinga Veng FC an hneh a nih chuan an rilru natna tam tak chu lak bo a ni thung ang.
Inelna sang ber khelh phak leh tumin Police an thawkrim a, MPL an awm lai ai maha an training ṭhatna hi 'Se bo hnua se kawngkhar' tih sak a thiang lo. Tuna an thawhrim avang hian tualchhung football-a Police hmelhem tawh chu siam ṭhatin a awm thei a, MPL club elpha tur bera ngaih pawh an ni. MFA Super Cup-ah match hnih lek la khel mah se Police hian goal 18 an khung tawh.
Police hian an khin tawk club chu an la tum lo ngei a, amah---erawhchu Mizoramin San-tosh Trophy-a kal tur team a tirh apiangin an player V. Lalṭan-puia, Vanlalhriata, F. Lalrin-puia, Lalbiakhlua, Lal-fakzuala leh Lallawmzuala-te hi hmaih an ni ngai lo.
Tun hnaia Mizo defender duhawm ber zinga mi Lalhmun-mawia bakah midfielder thawkrim Lalramtharmawia an neih bawk avangin Police-in an khingpui tawk tur I Day Football ṭan hmaa practice-naa an hneh tawh Chhinga Veng khelh hlan hi an nghakhlel a ni.
Hei le Chhinga Veng
Chhinga Veng FC coach Lal-remtluanga chuan, "I Day Football-ah kan dinhmun kan hre chiang a, kan tihsual siam ṭha turin kan thawkrim hle. Tunah chuan MFA Super Cup khel turin kan inpeih leh tawh a, Police hi ngam zek zawkin kan hmachhawn ang," tiin Vanglaini palai a hrilh a, an khingpui tur chu team ṭha tak an nih thu a sawi tel bawk.
MPL kaithar tana thu lawm-awm chu Aizawl FC aṭanga an lakluh Ronald Zothanzama a dam tawh a, I Day Football-a an buaina chu tlar hnung a ni. Chhinga Veng hian inelna hnuhnung berah hian hneh an nei lo a, Chanmari West FC nen inhnehtawkin bul ṭan mah se Aizawl FC, Chanmari FC leh AIFF Academy te an hneh lo vek.
Chhingcows (Chhinga Veng ṭantute) ten an club hmelhmang tak tak an la hmu lo niin a lang a, Chhinga Veng hian result ṭha nei turin player an nei a, transfer zawh hlima team ṭha zinga chhiar tel hi I Day Football zawh hnua dah hniam vak hi a thiang lo.
MPL-a player naran chung lam MS Dawngliana, Lal-khaw-puimawia, H. Lal-muankima, Lalchhanchhuaha, Joseph Lalnunpuia, Lalrozama Fanai, R.Laldinliana leh Ronald-a te awmna club hi team ṭha an ni.
Vawiin hi Chhinga Veng mipui tan an veng club ṭan hun a ni a, ṭan lam nei lo tan inkhel hmuhnawm en tura Lammual pan hun a ni. Chhinga Veng FC leh Mizoram Police zinga pakhat zawk hian quarterfinal an thleng pha dawn lo a - hei tak hi knockout football an ngaihhlut chhan pawh a ni reng a ni.