Arsenal buai a zual zel

Arsenal midfielder Aaron Ramsey chu a malpui hliam vangin thla khat chhung vel a inkhel thei dawn lo, manager Arsene Wenger tan a midfielder inhliam hi buaina tizualtu a ni thei.

Pathianni zan khan Gunners hian tun season-a an Premier League match hmasa ber atan Emirates Stadium-ah Liverpool lo mikhualin 4-3 in an mualpho a, inkhelh banah Gunners fans ṭhenkhat ten an manager an au el. He inkhelah hian Wales international Ramsey chu minute 61-naah hliam vangin thlak a ngai.

Wenger chuan, "Player ṭhenkhat chu an la fit tawk loh avangin inkhel tura thlan theih an la ni lo. Ramsey pawh kan inkhelh tir avangin a hliam phah - Euro 2016-a inlan player-te tan league khel chhunzawm turin a la hma deuh a ni," a ti. France manager hian Reds an hneh loh chhan chu a player-ten tawnhriat an la neih tlem vang a nih thu a sawi lang tel bawk.

Inrinniah Arsenal hian champion lai Leicester City an tlawh dawn a, August 27 khian Watford khel turin an zin chhuak zui bawk ang, heng an match pahnihahte hian Ramsey hi an chhawr thei dawn lo tihna a ni.

Tun dinhmunah Arsenal hian tlar hnungah captain Per Mertesacker leh Gabriel Paulista te hliam vangin an chhawr thei lo mek. Reds lakah rawlthar Calum Cham-bers leh Rob Holding te ruh a la no hle tih a lang - France international Laurent Koscielny chuan training zawm tawh mah se Wenger-a'n inkhel turin a la thlang lo.

Reds hmachhawn turin Wenger-a'n midfield laiah Mohamed Elneny leh Francis Coquelin te a thlang a, damkawr Santi Cazorla leh Jack Wilshere te bench-ah a dah thung. Season hmasa khan Ramsey hi Gunners inkhel khaidingtu pawimawh a ni a, kuminah pawh hian a mawhphurhna a sang hle.

North London club tana thu lawmawm pakhat chu kartawpa Foxes an hma-chhawn hunah chuan defender Koscielny, striker Olivier Giroud leh midfielder Mesut Ozil te an inlan thei tawh ang.