Dinthar FC hlau lotu Ramhlun FC

Ramhlun FC-in MPL hmasa bera Dinthar FC champion puitu player pawimawh Lalnunmawia an kawl a, Aizawl DFA First Division club hian MPL club hi an hneh theih an inring.

MFA Super Cup Last 16 match hmasa ber chu vawiin chhun dar 12:00 hian Lammualah khelh a ni dawn a, Ramhlun FC manager Anggu VL Hnamte chuan, "I Day Football-a an khelh dan en kha chuan chak zawk turah ka inngai a, tunah erawh kan chakna chance chu 50% a ni," tiin an khingpui MPL club Dinthar FC chu a dah san bik loh thu a sawi.

Ramhlun FC hi kum 2015-a din ni chauh mah se MPL final pawh lo thleng tawh Luangmual FC leiin Aizawl DFA First Division club an ni a, club hming an thlak nghal bawk.

Dinthar FC khingpui tur hi an club naupanna aṭanga en chi an ni lo a, club techical director pawh Shillong Lajong captain hlui leh Zo United enkawl tawhtu Samson Ramengmawi a ni a, an coach Lalngaihawma hi Red Ribbon Football-a Tuidam rawn vawrh lartu kha a ni. Minute 90 zawha penalty shootout pet nghal tur a nih avangin Dinthar FC tan khelh an harsa ang.

Ramhlun South club hi first division club an ni nachungin seeded zingah dah an ni lo a, amaherawhchu team ṭhazia chhuahin last 16 kalkawngah harsatna an tawk lo - match thum lekah goal 14 an khung.

Pune FC Academy-ah pawh lo awm tawh Lalremruata'n MFA Super Cup-ah goal li khung tawhin club top scorer a ni mek a, Remruata bakah hian Mawitea, Eric Pazawna (Mawitea nau), Ronald Lalzikpuia leh R. Lalhmingmawia te chu Ramhlun South-in NECS Cup an champion ṭuma khelpha an ni.

Dinthar an ṭang

Dinthar FC-in I Day Football-ah Bethlehem VT hnehin bul ṭan mah se, Zo United leh Ramhlun North FC te an hneh lo zui a, match hnuhnung berah Shillong Lajong an draw hram bawk.

MPL hmasa ber champion hian I Day Football group stage an paltlang loh avangin MFA Super Cup atan ngawrh zawkin an inpuahchah. Midfielder Lallawmkima (Tea) a inhliam avangin an kim dawn lo. Hnahlan aṭanga loan hmanga an lakluh Ramengmawia'n MFA Super Cup a khelh tawh avangin chhawr theih a ni lo bawk.

Dinthar FC coach Lalchhuan-awma (L.Ch-a) chuan, "I Day Football-a knockout stage kan thlen loh avangin kan player-te pawh an thawkrim hle. MFA Super Cup match hmasa berah pawh hian hnehna kan chan ngei ka beisei," tiin result ṭha nei tura theihtawp an chhuah thu a sawi.

Beiseina nen

Ramhlun North FC-in MPL club lian an barakhaih avangin Ram-hlun FC-in entawn tur ṭha tak an nei a, Ramhlun South hi football ngaina veng an nih avangin entu an neih tlem a rinawm loh.

Dinthar FC hian result ṭha an neih loh hnu-ah anmahni ṭantu Maimawms au thawm Lammualah hriat tur a awm ta meuh lo a; club thar laka an mual-pho loh nan Dinthar mipuiin an club hmangaih an
ṭawiawm a hun ta.

Ramhlun FC - Last 16 Kalkawng

First Round

Ramhlun FC 6 - 1 Kawrtethawveng FC

RAM : R Lalṭhapuia 14'; Alan Lalruatpuia 18'; Lalromawia 30'; Lalramthara 50', 66'; Lalremruata 80

KAW : Lalchanchhuaha 53'

Second Round

Ramhlun FC 4 - 2 Bethany FC Bawngkawn

RAM : Lalremruata 23'; Lalnunmawia 29'; Lalthangsanga 50' (P) ; Lalremruata 77'

BET : Lalhruaisanga 38'; Victor Lalbiaktluanga 61'

Third Round

Ramhlun FC 3 - 0 New Serchhip FC

RFC: Lalruatfela 12'; Lalrintluanga 23'; Lalremruata 56'

SUPPORTER-TE ṬHUTNA TUR

Ramhlun FC - K. Kawla Stand leh S. Malsawmtluanga Stand

Dinthar FC - Zomuanthanga Stand leh Zohminga Zote Stand

Neutral Supporter - Tlang