Reds-in Palace dawrna an hnawl

Liverpool chuan Crystal Palace-in pound maktaduai 30 bawr vela striker Christian Benteke lakluh tuma an dawrna chu an hnawl. Palace hian Reds hnenah hian pound maktaduai 23 pek phawta, a khelh ṭhat dan a zira pound maktaduai 7 pek belh an inhuam a, pound maktaduai 25-a an dawrna hmasa chu hnar sak an lo ni tawh bawk.

Reds hian July 2015 khan Aston Villa aṭang-in Benteke hi pound maktaduai 32.5-in an lalut a, season hman zawh takah Liverpool tan inelna hrang hrangah match 42 inlanin goal 10 a khung. Brendan Rodgers ban a nih hnuah Liverpool-in October khan Jurgen Klopp an lalut a, German coach hnuaiah Belgium international hian league match riatah chiah inkhel bul a ṭan a ni.