Inter-in Moussa Sissoko an duh

Newcastle United midfielder Moussa Sissoko chu Inter Milan leh Everton-in lakluh an duh niin French chanchinbu lar L'Equipe chuan a tarlang a, French midfielder hian tun kar chhung ngeiin club pahnih aiawhte hi Paris khawpuiah inbiakna a neihpui dawn niin an ziak bawk.

Kum 27-a upa French midfielder hian kum 2012 khan Ligue 1 club Toulouse aṭangin Newcastle United hi a zawm a, Magpies tan season li khel tawhin tun season-ah Championship lama an khelh dawn avangin St James' Park chhuahsan a duh thu hi ualau takin a lo sawi tawh.

Real Madrid nen pawha sawizawm hlawh midfielder hian kar hmasa lawk khan, "Real-in min duh tih ka hria a, kan indawr thuai ka beisei. Engpawhnise, club lian tak, Champions League-a khel thei tur zawm ka duh a, chu chu Magpies chhuahsan ka duh chhan a ni," tiin a lo sawi tawh a, Newcastle United manager Rafael Benitez chuan France tana vawi 44 inlan tawh midfielder hi tlawm taka hralh an tum loh thu a sawi ve thung.